महिलेसोबत भयंकर प्रकार, मग पोलिसांनीही ना छापा, ना पाठलाग केला, थेट डिलिव्हरी बॉयचाच अवतार घेतला, पुढे…

लग्नासाठी जोडीदार शोधणाऱ्या महिलेला मॅट्रिमोनियल साइटवरून संपर्क साधत तब्बल ६ लाख २५ हजार रुपयांचा गंडा घालणाऱ्या आरोपीला वाशी पोलिसांनी अटक केली आहे. नागेश अर्जुन पवार असं मुख्य आरोपीचं नाव असून, पोलिसांना गुंगारा देण्यासाठी तो गेल्या चार दिवसांपासून वेगवेगळ्या ठिकाणी लपून राहत होता. अखेर तांत्रिक तपासाच्या आधारे पोलिसांनी मीरा-भाईंदरमधील एका लॉजचा शोध घेतला. मात्र, आरोपीला संशय येऊ नये म्हणून पोलिसांनी चक्क डिलिव्हरी बॉयचा वेश धारण केला आणि त्याला ताब्यात घेतलं. या प्रकरणात आणखी एका आरोपीलाही अटक करण्यात आली असून, दोघांची चौकशी सुरू आहे.

वेगवेगळी कारणं देत महिलेकडून पैसे उकळले

पीडित महिलेने जीवनसाथी डॉट कॉम या विवाहविषयक संकेतस्थळावर लग्नासाठी इच्छुक असल्याची जाहिरात केली होती. याच जाहिरातीच्या माध्यमातून नागेश पवारने तिच्याशी संपर्क साधला. ओळख वाढवत विश्वास संपादन केल्यानंतर २४ सप्टेंबर रोजी त्याने गाडीमध्ये बिघाड झाल्याचं कारण सांगत तातडीने पैशांची गरज असल्याचं महिलेला सांगितलं. सुरुवातीला ६५ हजार रुपये घेतल्यानंतर वेगवेगळी कारणं देत त्याने महिलेकडून पैसे उकळले.

खात्यामधील पैशांचाही गैरवापर केला

त्याचबरोबर बँकेचे खातेविवरण, ओटीपी आणि अन्य महत्त्वाची माहिती मिळवून तिच्या खात्यातील रकमेचाही गैरवापर केल्याचा आरोप आहे. अशा प्रकारे एकूण ६ लाख २५ हजार रुपयांची फसवणूक झाल्याचं तक्रारीत नमूद आहे.

पैसे परत मिळत नसल्याने आणि लग्नाबाबत आरोपीकडून टाळाटाळ होत असल्याने महिलेला समजलं की, आता आपली फसवणूक झाली आहे. त्यानंतर तिने पोलिसांकडे तक्रार दाखल केली. प्रकरणाचं गांभीर्य लक्षात घेऊन वाशी पोलिसांनी गुन्हा दाखल करत तांत्रिक तपास सुरू केला. आरोपी मीरा रोड-भाईंदर परिसरात असल्याची माहिती मिळाल्यानंतर पोलिसांचं पथक तेथे रवाना झालं. आरोपी लॉजमध्ये लपल्याचं समजल्यानंतर डिलिव्हरी बॉयचा वेश धारण करून पोलिसांनी त्याला अटक केली. यासंबंधीची सर्व माहिती शशिकांत चांदेकर, वरिष्ठ पोलीस निरीक्षकांनी टीव्ही9 मराठीशी बोलताना दिली आहे.