नवी मुंबईत तुफान पाऊस… उघड्या वायरींचं पाण्यात करंट, दोन मुलींना शॉक लागला; शहरात खळबळ
Navi Mumbai Rain : नवी मुंबईत पावसाचा कहर पहायला मिळत आहे. अशातच नेरूळ येथील LP ब्रिज शेजारी दोन विद्यार्थीनींना शॉक लागल्याची घटना समोर आली आहे.
मुंबईसह उपनगरात पावसाला सुरुवात झाली आहे. सकाळपासून मुसळधार पाऊस कोसळत असल्याने नागरिकांचे प्रचंड हाल होत आहेत. नवी मुंबईत पावसाचा कहर पहायला मिळत आहे. या पावसामुळे वेगवेगळे अपघातदेखील घडले आहेत. नेरूळ येथील LP ब्रिज शेजारी दोन विद्यार्थीनींना शॉक लागल्याची घटना समोर आली आहे. या मुली रस्त्याने जात असताना विजेची वायर खाली पडली होती, या वायरचा मुलींना स्पर्श झाल्याने त्या दोघींना शॉक लागला त्या बेशुद्ध पडल्याचे समोर आले आहे. याबाबत सविस्तर माहिती जाणून घेऊयात.
नेरूळमध्ये विद्यार्थीनींना लागला शॉक
LP ब्रिज शेजारी दोन विद्यार्थीनींना शॉक लागल्याने नेरूळमध्ये खळबळ उडाली आहे. या मुलींना बाजूला असलेल्या डी वाय पाटील या रुग्णालयात भरती करण्यात आले आहे. सध्या त्यांची प्रकृती स्थिर आहे. मात्र महानगरपालिकेने त्यांना सध्या वाशीतील फोर्टीज रुग्णालयात देखरेकीखाली ठेवले आहे. पहिल्याच पावसात ही खळबळजनक घटना घडली आहे. सध्या घटनास्थळी बॅरिकेट लावून परिसर सील करण्यात आलेला आहे. महावितरणचे अधिकारी आणि पोलिस या घटनेचा अधिकचा तपास करत आहेत.
काय म्हणाल्या महापौर?
या घटनेबाबत बोलताना नवी मुंबई महापालिकेच्या महापौर सुजाता पाटील यांनी म्हटले की, ‘ही दुर्देवी घटना आहे, नक्की चूक कोणाची आहे याचा आम्ही तपास करत आहोत. महावितरण की इतर कोणी दोषी आहे याचा तपास सुरू आहे. या दोन मुलींना आम्ही फोर्टीज रुग्णालयात देखरेखीसाठी ठेवलं आहे. दरम्यान, या विद्यार्थीनींना प्रकृतीत सुधारणा झाल्यानंतर घरी सोडण्यात येणार असल्याचीही माहिती समोर आली आहे.’
नवी मुंबईत अनेक ठिकाणी साचले पाणी
नवी मुंबईतील अनेक भागात पाणी साचले आहे, याबाबत बोलताना सुजाता पाटील यांनी म्हटले की, ज्या ठिकाणी पाणी साचलं तिकडे मी जात आहे. प्रत्येक अधिकाऱ्याला मी काम योग्य पद्धतीने करायला सांगत आहे. नालेसफाई झाली आहे, मात्र आपण सर्वानी काळजी घेतली पाहिजे. सिडको देखील दुर्लक्ष करत आहे, त्यामुळे पाणी साचलं आहे. आम्ही सिडकोच्या एमडींशी बोलण्याचा प्रयत्न करत आहोत.
