५ हजार कोटींचा दावा करा पण…; अब्रुनुकसानीच्या दाव्यावर नवनाथ बनांचं मोठं आव्हान, शिवराज मोरेंसमोर ठेवली एकच अट!

शिवराज मोरे यांनी नवनाथ बन यांच्यावर अब्रुनुकसानीचा दावा ठोकणार असे वक्तव्य केले होते. तरुणीसोबत व्हिडिओ व्हायरल झाल्यानंतर नवनाथ बन यांनी शिवराज मोरेंवर गंभीर आरोप केले होते. या आरोपांना उत्तर देण्यासाठी शिवराज मोरेंनी पत्रकार परिषद घेतली होती. यात त्यांनी मोठा खुलासा करत नवनाथ बन यांच्यावर घणाघाती टीका केली होती. तसेच त्यांच्याविरोधात कारवाई करण्याचा दावा केला होता. यानंतर आता या सगळ्यावर नवनाथ बन यांनी प्रतिक्रिया दिली आहे. शिवराज मोरे यांच्या अब्रुनुकसानीच्या दाव्यावर मोठं आव्हान दिलं आहे.

या प्रकरणी बोलताना नवनाथ बन म्हणाले की, मी शिवराज मोरेंची पोलखोल केली होती. मुलीवर काही बोललो नाही. मी त्या ताईबाबत कोणताच अपशब्द वापरला नाही. ड्रग्ज होते त्याचे काय केले? त्रास देणाऱ्याबाबत कोणत्या पोलीस स्टेशनला तक्रार केली? शिवराज मोरेंना फोन आला ते मदतीला गेले, पण हाणामारी का केली? त्या मुलीला छेडणाऱ्यावर तक्रार कोणत्या पोलीस स्टेशला केली? आंदोलन सोडून का तिथे गेला? अशा प्रश्नांचा भडिमार बन यांनी मोरेंवर केला आहे.

ते म्हणाले की, त्या तरुणीवर मी बोललोच नाही. पण ते विद्यार्थी आहेत का हा माझा रोहित पवारांना सवाल आहे. ड्रग्ज कोणत्या पोलीस स्टेशनला जमा केले की स्वत:जवळच ठेवले? तुम्ही कोणती परीक्षा देत आहात? रोहित पवारांच्या आंदोलनात 20 टक्के मुलं आणि 80 टक्के बाकीचे लोक आहेत. आंदोलनात बारामतीचे अॅग्रोचे लोक आहे. त्यांची अब्रू नसेल तर 0 चा दावा केला असेल. मी साधे प्रश्न विचारले होते. तुम्ही जे करताय त्याला पळपुटेपणा म्हणतात, अशा शब्दात नवनाथ बन यांनी मोरेंना सुनावले आहे. तसेच एक आव्हान दिले आहे.

नवनाथ बन पुढे म्हणाले की, माझे आव्हान आहे 5 हजार कोटींचा दावा करा. कोर्टात काय करायचे ते आम्ही पाहू. विनाकारण आंदोलन ताणायचे आणि राहुल गांधींना इथे आणायचे. त्यानंतर प्रदेशअध्यक्षपद मागायचे, असे सुरु आहे. नवनाथ बन कोणालाही घाबरत नाही. माझ्या साध्या सरळ प्रश्नांची उत्तर द्या. ड्रग्ज सापडले असेल आणि जर ते पोलीसांच्या स्वाधीन केले नसेल तर हा सर्वात मोठा गुन्हा आहे. माझे पुणे पोलिसांना विनंती आहे या प्रकरणाचा पूर्ण तपास करावा, अशी मागणी त्यांनी केली आहे.