Sunetra Pawar NCP : राष्ट्रवादी काँग्रेसमधल्या अंतर्गत वादावर अखेर सुनेत्रा पवार यांनी घेतला महत्वाचा निर्णय
Sunetra Pawar NCP : राष्ट्रवादी काँग्रेस पक्षात सुरु असलेल्या अंतर्गत वादावर अखेर सुनेत्रा पवार यांनी भूमिका घेतली आहे. प्रदेशाध्यक्ष सुनील तटकरे आणि प्रफुल पटेल हे पक्षात नाराज असल्याचं बोललं जात आहे. सुनील तटकरे यांनी तर चक्क शरद पवार यांची भेट घेतली आहे.
सध्या राष्ट्रवादी काँग्रेसमध्ये सर्व काही आलबेल नसल्याचं समोर येत आहे. राष्ट्रवादी काँग्रेसच्या नवीन राष्ट्रीय कार्यकारिणीच्या यादीवरून पक्षात विसंवाद निर्माण झाला आहे. काही नेते नाराज झाले आहेत. यामागे कारणही तशीच आहेत. राष्ट्रवादी काँग्रेस पक्षाकडून निवडणूक आयोगाला सादर केलेल्या पत्रात अनेक नेत्यांच्या नावासमोर पदाचा उल्लेख नव्हता. केंद्रीय निवडणूक आयोगाला पक्षाकडून सादर करण्यात आलेल्या पत्रात खासदार सुनील तटकरे यांच्या नावासमोर प्रदेशाध्यक्ष पदाचा उल्लेख नव्हता. पण अरुणाचल प्रदेशचे प्रदेशाध्यक्ष टोको तातूंग यांच्या नावासमोर प्रदेशाध्यक्ष असा स्पष्ट उल्लेख करण्यात आला होता. त्यामुळे सुनील तटकरे नाराज असल्याची चर्चा होती. प्रफुल पटेल यांना सुद्धा डावललं जात असल्याची चर्चा आहे. सुनील तटकरे यांनी तर थेट सिलव्हर ओकवर जाऊन शरद पवार यांची भेट घेतली.
प्रकृतीची विचारपूस करण्यासाठी शरद पवारांना भेटलो असं सुनील तटकरेंकडून सांगण्यात आलं. त्यानंतर शरद पवार यांनी सुनील तटकरे आणि प्रफुल पटेल यांच्याबाबत क्षमता असणारे नेते म्हणून कौतुक केलं. त्यांच्या क्षमतेचा कसा वापर करावा, हा त्यांच्या आत्ताच्या नेतृत्वाचा अधिकार आहे, असं शरद पवार म्हणाले. राष्ट्रवादी काँग्रेसमध्ये सुरु असलेला हा विसंवाद आणि मतभेदांची दरी वाढल्यानंतर आता सुनेत्रा पवार सक्रीय झाल्या आहेत. त्यांनी सुनील तटकरे आणि प्रफुल पटेल यांच्याशी फोनवरुन चर्चा केल्याची माहिती आहे. लवकरच पक्षाच्या कोअर कमिटीची बैठक बोलवली जाणार आहे. सूत्रांनी ही माहिती दिली आहे.
आमदारांमध्ये दबक्या आवाजात काय चर्चा?
राष्ट्रवादी काँग्रेसमध्ये सध्या संभ्रमावस्था आहे. राष्ट्रवादीच्या कार्यकारिणीवरुन पक्षात नाराजी असल्याची माहिती आहे. आमदारांचा एक गट सुनील तटकरे आणि प्रफुल पटेल यांचं समर्थन करतो. दुसरा गट सुनेत्रा पवार आणि पार्थ पवार यांचं समर्थन करतो. पार्थ पवार यांच्या कार्यपद्धतीला सुनेत्रा पवार यांचं समर्थन असल्यामुळेच पक्षात हे सर्व सुरु असल्याची आमदारांमध्ये दबक्या आवाजात चर्चा आहे. सुनेत्रा पवार यांना डॅमेज कंट्रोल करण्यात कितपत यश येतं ते लवकर समजेलं. दरम्यान राष्ट्रवादीच्या एका बड्याने नेत्याने पार्थ पवार यांना समज द्यावी म्हणून शरद पवार यांची भेट घेतल्याचं बोललं जात आहे.
