Ajit Pawar Plane Crash : तक्रार दाखल करण्यासाठी गेलेल्या रोहित पवारांना मुख्यमंत्री कार्यालयातून फोन, काय झालं बोलणं?
अजित पवार विमान अपघात चौकशीत रोहित पवार आक्रमक झाले असून, त्यांना मुख्यमंत्री कार्यालयाकडून चर्चेसाठी बोलावणे आले आहे. 'देवगिरी'वर स्मारक आणि अपघाताच्या संशयास्पद पैलूंवर उद्याच्या बैठकीत चर्चा होणार असून, बारामतीमध्ये तणावाचे वातावरण आहे.
राज्याचे माजी उपमुख्यमंत्री अजित पवार यांच्या २८ जानेवारी रोजी झालेल्या भीषण विमान अपघाताने महाराष्ट्र हादरला आहे. त्यांच्या निधनानंतर या प्रकरणी नवनवीन खुलासे होताना दिसत आहेत. राष्ट्रवादी काँग्रेस शरद पवार गटाचे आमदार रोहित पवार यांनी अजित पवारांच्या अपघाताच्या चौकशी करावी, अशी मागणी वारंवार केली आहे. आज यासंदर्भात त्यांना बारामती पोलिसांकडे तक्रार दाखल करण्याची मागणी केली. मात्र अद्याप ही तक्रार दाखल करण्यात आलेली नाही. त्यातच आता रोहित पवारांना थेट मुख्यमंत्री कार्यालयाकडून (CMO) फोन आल्याने राजकीय वर्तुळात मोठी खळबळ उडाली आहे.
मुख्यमंत्री कार्यालयातून फोन कशासाठी? रोहित पवारांचा खुलासा
नुकत्याच झालेल्या पत्रकार परिषदेत रोहित पवार यांनी मुख्यमंत्री कार्यालयातून आलेल्या फोनबाबत सविस्तर माहिती दिली. आम्ही एवढे मोठे नाही की आम्हाला मुख्यमंत्री फोन करतील. मला मुख्यमंत्र्यांच्या कार्यालयातून फोन आला होता. अजितदादांच्या स्मारकाबाबतचा एक विषय मी मांडत होतो, त्याबद्दल चर्चा करायची होती. आज ती बैठक होणार नाही. पण उद्या संध्याकाळी ती बैठक होईल, असे रोहित पवार म्हणाले.
आगामी अर्थसंकल्पात या स्मारकासाठी निधीची तरतूद करण्याबाबत चर्चा करण्यासाठी हा फोन आला होता. या बैठकीत आम्ही अजित दादांचे स्मारक व्हावं ही मागणी करुच, पण त्यासोबतच चौकशीबद्दलची जी काही माहिती माझ्याकडे आहे, त्याबद्दलचीही माहिती आम्ही त्यांना देऊ. तसेच माझ्याकडे जे काही कागदपत्रे आलेत ते देखील मी त्यांना देईन, असे रोहित पवारांनी सांगितले.
रोहित पवार यांनी यावेळी CID आणि DGCA यांच्या कार्यपद्धतीवर गंभीर आरोप केले आहेत. या नियमानुसार अपघाताचा प्राथमिक अहवाल १५ फेब्रुवारीपर्यंत येणे अपेक्षित होते. मात्र, २४ तारीख उलटूनही DGCA ने कोणताही अधिकृत रिपोर्ट दिलेला नाही. बारामतीकरांनी जो बंद पाळला आणि जनतेने जो रोष व्यक्त केला, त्यामुळेच आता DGCA आणि CID वर दबाव आला आहे. आज CID पत्रकार परिषद घेऊन काय सांगणार आहे, याकडे आमचे लक्ष आहे, असेही रोहित पवार म्हणाले.
गुन्हा दाखल करून घेण्यास नकार
दरम्यान अजित पवारांच्या अपघाताप्रकरणी मुंबई पोलिसांनी गुन्हा दाखल करून घेण्यास नकार दिला होता. याप्रकरणी रोहित पवार यांनी थेट बारामती पोलीस ठाण्यात धाव घेतली. यावेळी त्यांनी रोहित पवार, युगेंद्र पवार आणि वडील राजेंद्र पवार यांच्यासह बारामती पोलीस ठाण्यात पोहोचले. त्यांनी DGCA आणि विमान कंपनी VSR विरोधात तक्रार अर्ज दिला. यावेळी बारामती पोलीस ठाण्याबाहेर मोठ्या संख्येने अजित पवारांचे समर्थक जमा झाले होते.
