खासदार कोल्हेंनी एकांतवासाचं ‘अनमोल’ गुपित उलगडलं; राजकीय संन्यास की उगवतीचा सूर्य, घ्या जाणून!
खासदार कोल्हे म्हणाले, आपल्याला पुरुषानं रडायचं नाही, त्यानं हळवं व्हायचं नाही हेच माहितंय. आपलं हळवेपण, भावना सार्वजनिक करायच्याच नाहीत. शिव्या देणं, कणखर असणं म्हणजेच पुरुष, असं शिकवलं गेलं. स्वप्न, आकांक्षा, गरजेच्या सीमारेषा पुसट झाल्या. आपण कशासाठी धावतोय, हेच विसरलो.
नाशिकः खासदार अमोल कोल्हे यांनी 7 नोव्हेंबर रोजी एक पोस्ट लिहिली आणि आपण एकांतवासात जात असल्याचं सांगितलं. यावरून अनेक चर्चा रंगल्या. थेट राजकीय संन्यास ते त्यांचं पक्षांतर. मात्र, या साऱ्या तर्कांना पूर्णविराम देत, अखेर अमोल कोल्हे यांनी स्वतःच आपल्या एकांतवासाचं गुपित उलगडलंय.
शंभूराजे – शिवरायांच्या पात्रांमध्ये जीव ओतून रमणारे, आपल्या दमदार अभिनयाने खिळवून ठेवणारे, राजकारणात स्वतःचं वेगळं क्षेत्र निर्माण करणारे खासदार अमोल कोल्हे एकांतवासात गेल्यानंतर चर्चा होणारच. या एकांतवासाचा अनेकांनी आपापल्या वकुबानुसार किस पाडला. अनेकांनी ना-ना तर्कवितर्क लढवले. या साऱ्यांना स्वतःचा एक व्हिडिओ पोस्ट करत खासदार अमोल कोल्हे यांनी उत्तर दिलंय. ते म्हणाले की, आपण माझी काळजी केली. अनेक जण माझ्या एकातंवासाच्या पोस्टवर व्यक्त झाले. मला मात्र, यातून एक जाणीव झाली. ती म्हणजे आपल्या मानसिक आरोग्याच्या जाणिवेची गरज. तुमच्या-माझ्यासारख्या माणसाला येणारा आणि दुर्लक्षिला जाणारा मानसिक थकवा. ही मला सर्वात महत्त्वाची गोष्ट वाटली. आपण अनेक दुर्दैवी बातम्या ऐकतो. वयाच्या तिशीच ह्रदविकारानं मृत्यू, पस्तीशित मधुमेह. अस्थमा, डोकेदुखी वगैरे…वगैरे. या साऱ्या आजाराचे मूळ आपल्या मानसिकतेत आहे, असे एक डॉक्टर म्हणून कोल्हे यांनी स्पष्ट केलं. त्यांनी पुरुषांच्या भावनांचा पटच या भावनिक आवाहनातून उलगडला. ते पुढे म्हणाले, आपल्याला पुरुषानं रडायचं नाही, त्यानं हळवं व्हायचं नाही हेच माहितंय. आपलं हळवेपण, भावना सार्वजनिक करायच्याच नाहीत. शिव्या देणं, कणखर असणं म्हणजेच पुरुष, असं शिकवलं गेलं. स्वप्न, आकांक्षा, गरजेच्या सीमारेषा पुसट झाल्या. आपण कशासाठी धावतोय, हेच विसरलो. एकवेळ आपण धावताना थकतो. त्यावेळी शरीर थांबतं, पण मनाचं काय, असा सवाल त्यांनी यावेळी केला. त्याचं उत्तरही त्यांनी दिलं. ते पुढे म्हणाले, ग्रामीण भागातून शहरात येणारा प्रत्येक जण विभक्त कुटुंबात स्थिरावतो. त्याला मन कुठं मोकळं करायचं हेच समजतं नाही. त्याच्या आत खूप काही साचत जातं. यातूनच मधुमेह, ह्रदयविकार इतर आजार जडतात. त्यामुळं व्यक्त व्हा, मोकळे व्हा. हे होताना स्वतःला कमकुवत समजू नका. कणखरपणा वगैरे वगैरे ही सारी बेगडी विशेषणं आहेत, असं आवाहनही त्यांनी केलं.
उगवतीचा सूर्य खासदार कोल्हे पुढे म्हणाले की, आपल्या भावनांचा निचरा होऊ द्या. खूप धावल्यानंतर थोडं थांबा. घडीभर विश्रांती घ्या. मी थांबलो तेव्हा अनेकांनी हा मावळतीचा सूर्य असल्याचं म्हटलं. आपण इतके निगेटिव्ह का झालोयत. आपली संस्कृती पाहा. हा मावळतीचा सूर्य नसून उगवतीचा सूर्य आहे. तुम्ही याचं अनुकरण केलं, की मानसिक ताण, मधुमेह आणि ह्रदयविकारापासून दूर व्हालच. मी अनेक विषयांवर चिंतन केलंय. त्यावर कालांतरानं व्यक्त होईन. मात्र, म्हणतात ना लोक सेलिब्रेटी आणि राजकारण्यांचं अनुकरण करतात. त्यामुळं मी सारं तुमच्यासाठी सांगतोय. तुम्ही हे अनुकरण केलेलं मला आवडेल. आपला मानसिक थकवा स्वीकारा. उरफुटेस्तोर धावण्याऐवजी थोडं थांबा. स्वतःत डोकावून पुन्हा उगवतीचा सूर्य घेऊन पुढे चाला. या वाटचालीत तुम्हाला साथ देण्यासाठी मी माझं यू ट्यूब चॅनल घेऊन येतोय, अमोल ते अनमोल, ही घोषणा करायलाही ते विसरले नाहीत. चला, तर मग. आपणही आपलं मानसिक आरोग्य जपू. खासदार आणि आपल्या लाडक्या अभिनेत्याचा आवाहनाला साद देऊ. (NCP MP Amol Kolhe revealed the secret of his solitude)
इतर बातम्याः
Sonam Kapoor | भारतीय पोशाखातही ग्लॅमरचा तडका, सोनम कपूरचा दिलकश अंदाज पाहून चाहतेही घायाळ!#SonamKapoor | #Bollywood | #Entertainment https://t.co/QPw67BsFsS
— TV9 Marathi (@TV9Marathi) November 13, 2021
