NEET Paper Leak: नीट पेपरफुटी प्रकरणात मोठी अपडेट! मनीषा हवालदारला थेट… नेमकं काय घडलं?

देशभरात खळबळ उडवून देणाऱ्या ‘नीट’ (NEET) पेपरफुटी प्रकरणाचे धागेदोरे आता लातूरमध्ये अधिक गडद होताना दिसत आहेत. या प्रकरणाचा तपास करणाऱ्या केंद्रीय अन्वेषण विभागाने (CBI) लातूरमध्ये आपली पाळेमुळे घट्ट रोवली असून, गेल्या आठ दिवसांपासून येथे सातत्याने चौकशीचे सत्र सुरू आहे. आता या प्रकरणातील आरोपी मनीषा हवालदारबाबत मोठी अपडेट समोर आली आहे. तसेच या तपासादरम्यान सीबीआयने आतापर्यंत लातूरमधील तब्बल चार बड्या डॉक्टरांची चौकशी केल्याने वैद्यकीय आणि शैक्षणिक वर्तुळात प्रचंड खळबळ उडाली आहे.

नीट पेपरफुटी प्रकरणात अटक करण्यात आलेली आरोपी मनीषा हवालदारवर ती कार्यरत असलेल्या संस्थेने तात्काळ निलंबनाची कारवाई केली आहे. मनीषा हवालदार ही ‘विद्या प्रसारिणी सभा’ या नामांकित संस्थेत कार्यरत होती. तिच्या अटकेची बातमी समोर येताच संस्थेने तातडीने पावले उचलली आहेत.

याबाबत अधिकृत भूमिका मांडताना विद्या प्रसारिणी सभेचे सेक्रेटरी सतीश गवळी यांनी सांगितले की, “काल सायंकाळी प्रसारमाध्यमांच्या द्वारेच आम्हाला मनीषा हवालदारला नीट पेपरफुटी प्रकरणात अटक झाल्याची माहिती मिळाली. आमच्या संस्थेला गेल्या अनेक वर्षांपासून एक मोठी आणि गौरवशाली परंपरा लाभलेली आहे. असे असताना संस्थेच्या एखाद्या व्यक्तीने अशा प्रकारे बेकायदेशीर कृत्य करणे अत्यंत निषेधार्थ आहे. या कृत्याची गंभीर दखल घेत आम्ही मनीषा हवालदारवर तात्काळ निलंबनाची कारवाई केली आहे.”

‘विद्यार्थ्यांचे नुकसान करणाऱ्यांवर कठोर कारवाई व्हावी’

संस्थेचे सेक्रेटरी सतीश गवळी यांनी पुढे स्पष्ट केले की, या पेपरफुटीमुळे देशातील लाखो प्रामाणिक विद्यार्थ्यांचे अतोनात नुकसान झाले आहे. त्यामुळे या प्रकरणाच्या मुळाशी जाणे गरजेचे आहे. सीबीआयच्या तपास यंत्रणेला संस्थेकडून पूर्ण सहकार्य केले जाईल, तसेच विद्यार्थ्यांचे भविष्य उद्ध्वस्त करणाऱ्या मनीषा हवालदारवर कायद्यानुसार कठोरभरात कठोर कारवाई झालीच पाहिजे, अशी मागणीही त्यांनी केली.

बड्या कोचिंग क्लासेसशी ‘कनेक्शन’ असल्याचा संशय

मिळालेल्या माहितीनुसार, सीबीआयच्या रडारवर आलेल्या या चार डॉक्टरांमध्ये नामांकित आयुर्वेदिक आणि बालरोग तज्ज्ञांचा (Pediatricians) समावेश आहे. या चारही डॉक्टरांचे लातूरमधील प्रसिद्ध शैक्षणिक संस्था चालक पी. व्ही. कुलकर्णी किंवा मोटेगावकर यांच्याशी थेट कनेक्शन असल्याचा दाट संशय सीबीआयला आहे. गेल्या आठ दिवसांपासून सीबीआयचे पथक लातूरमध्ये तळ ठोकून आहे. या डॉक्टरांच्या चौकशीतून अनेक महत्त्वाचे धागेदोरे हाती लागण्याची शक्यता असून, आगामी काळात लातूरमधील आणखी काही बड्या व्यक्तींची आणि डॉक्टरांची चौकशी होण्याची शक्यता वर्तवली जात आहे.