निलेश चव्हाण नेपाळला कसा पोहोचला? वैष्णवी हगवणे प्रकरणातील आरोपीबाबत धक्कादायक माहिती समोर

वैष्णवी हगवणे प्रकरणात आरोपी असलेला निलेश चव्हाण हा गुन्हा दाखल झाल्यानंतर फरार झाला होता, पोलिसांच्या सहा पथकांकडून त्याचा शोध सुरू होता, अखेर त्याला अटक करण्यात पोलिसांना यश आलं आहे. निलेश चव्हाण याला पिंपरी -चिंचवड पोलिसांनी नेपाळमधून अटक केलं आहे. वैष्णवीचं बाळ निलेश चव्हाणकडे होतं. हे बाळ आणण्यासाठी गेलेल्या कस्पटे  कुटुंबाला बंदूक दाखवून धमकावल्याचा त्याच्यावर आरोप आहे.

नेमका काय आहे आरोप?  

वैष्णवीचं बाळ निलेश चव्हाण याच्याकडे होतं, निलेश चव्हाण हा वैष्णवीची नणंद करिष्मा हिचा मित्र आहे. दरम्यान वैष्णवीचं बाळ आणण्यासाठी आलेल्या कस्पटे कुटुंबाला बंदूक दाखवून धमकावल्याचा त्याच्यावर आरोप आहे, तर बाळाची हेळसांड केल्याप्रकरणी त्याच्यावर गुन्हा दाखल करण्यात आला होता, गुन्हा दाखल झाल्यानंतर तो फरार झाला होता. सुरुवातीला पोलिसांच्या तीन पथकांकडून निलेश चव्हाण याचा शोध सुरू होता, त्यानंतर पथकांची संख्या वाढवण्यात आली, सहा पोलिसांचे पथक निलेश चव्हाणच्या मागावर होते. अखेर त्याला आज नेपाळमधून अटक करण्यात पोलिसांना यश मिळालं आहे. निलेश चव्हाण नेपाळला कसा पोहोचला, एवढ्या दिवस तो कुठे होता  याबाबत पोलीस अधिकारी संदीप डोईफोडे यांनी माहिती दिली आहे.

डोईफोडे यांनी काय सांगितलं? 

निलेश चव्हाण हा पुण्याहून रायगडला गेला, तिथून तो बायरोड दिल्लाला पोहोचला. दिल्लीला गेल्यानंतर तो बसने गोरखपूर युपीला गेला. उत्तर प्रदेशमधून मग तो नेपाळ बॉर्डर क्रॉस करून नेपाळमध्ये गेला, त्यानंतर काठमांडू आणि त्या परिसरामध्ये राहून परत तो बॉर्डर ओलांडून इकडे येण्याचा प्रयत्न करत होता.

आज आपल्या  देशाच्या हद्दीमध्ये आल्यानंतर त्याला अटक करण्यात आली. नोपाळमध्ये त्याने कधी एन्ट्री केली, तो किती दिवस राहिला या संदर्भातील माहिती चौकशीतून समोर येईल, परंतु त्याचा तीन ते चार दिवसांपासून नेपाळ, भारत बॉर्डर असा  प्रवास सुरू होता. निलेश चव्हाण याच्या शोधासाठी गुन्हे शाखेचो तीन पथक तयार करण्यात आले होते.  त्यातील एक टीम ही फिल्ड वर्क करणारी होती, दुसरी टीम तांत्रिक मदत करत होती. तर तिसरी टीम लोकल कॉर्डिनेशनसाठी बनवण्यात आली होती, अशी माहिती डोईफोडे यांनी दिली.