जिल्हा बँकेच्या निवडणुकीवरून नाराजी, दुष्काळी मदतीवरून सरकारला सवाल; निलेश लंके नेमकं काय म्हणाले?

अहिल्यानगर जिल्ह्यातील दुष्काळसदृश्य परिस्थितीची केंद्रीय पथकाकडून प्रत्यक्ष पाहणी करण्यात आली आहे. या पाहणीचं राष्ट्रवादी काँग्रेस शरदचंद्र पवार पक्षाचे खासदार निलेश लंके यांनी स्वागत केले आहे. मात्र केवळ पाहणी न करता सरकारने शेतकऱ्यांना तातडीने मदत द्यावी, अशी मागणी निलेश लंके यांनी केली आहे. तसेच आगामी नवरात्र आणि दसऱ्याच्या सणापूर्वीच दुष्काळग्रस्त शेतकऱ्यांच्या खात्यावर मदत जमा करावी, अशी मागणीही त्यांनी केली. यानंतर त्यांनी दिल्ली आंदोलन आणि बँक निवडणुकीवर एक वक्तव्य केले आहे. ते आता चर्चे आले आहे.

केंद्रीय पथकाच्या पाहणीसाठी सरकारने दाखवलेली तत्परता शेतकऱ्यांना मदत देतानाही दाखवावी, अशी टीका खासदार निलेश लंके यांनी केली आहे. दिल्ली येथे झालेल्या इंडिया आघाडीच्या आंदोलनावरून राष्ट्रवादी शरदचंद्र पवार पक्षाचे खासदार निलेश लंके यांनी निशाणा साधला आहे. इंडिया आघाडीच्या वतीने ना भूतो ना भविष्य असे आंदोलन झाले असून एकावेळी एवढे खासदार रस्त्यावर उतरणे ही विचार करण्याची गोष्ट असल्याचं लंके यांनी म्हटलं आहे या सरकार विरोधात जनतेचा आक्रोश आहे.

मतचोरी, ईव्हीएम मशीन, बेरोजगारी असे अनेक प्रश्न देशात असल्याचं लंकेने सांगितलं. तसेच एमपीएससी पेपर फुटी प्रकरणी अनेक तरुणांचे भविष्य धोक्यात आले आहे. ज्या युवकांकडे देशाचे भविष्या आहे. त्यांना रस्त्यावर उतरून आंदोलन करण्याची वेळ येत असून हे मोठे दुर्दैव असल्याचे खासदार निलेश लंके यांनी म्हटले आहे.

अहिल्यानगर जिल्हा मध्यवर्ती सहकारी बँकेच्या निवडणुकीवरून जिल्ह्यातील राजकीय वातावरण चांगलंच तापलं आहे. जिल्हा बँकेची निवडणूक बिनविरोध व्हावी, यासाठी काँग्रेसचे नेते बाळासाहेब थोरात यांच्या अध्यक्षतेखाली सर्वपक्षीय बैठक घेण्यात आली होती. मात्र या बैठकीला खासदार निलेश लंके यांच्यासह जिल्ह्यातील अनेक प्रमुख नेत्यांना निमंत्रण न दिल्याने नाराजी व्यक्त करण्यात आली. यानंतर नाराज गटाची स्वतंत्र बैठक पार पडली. या बैठकीत खासदार निलेश लंके यांनी जिल्ह्याची कामधेनू असलेल्या जिल्हा बँकेची निवडणूक बिनविरोध व्हावी, यासाठीच ही बैठक घेतल्याचं स्पष्ट केलं.

ज्या नेत्यांना सर्वपक्षीय बैठकीत डावलण्यात आलं, अशा सर्वांना एकत्र घेऊन ही बैठक घेण्यात आल्याचे निलेश लंके यांनी सांगितले. तसेच आपल्या पक्षाच्या वरिष्ठ नेत्यांशी चर्चा करून पुढील दोन दिवसांत जिल्हा बँकेच्या निवडणुकीबाबत भूमिका स्पष्ट केली जाईल, असेही त्यांनी म्हटले आहे. जिल्हा बँकेची निवडणूक बिनविरोध व्हावी, याला आमचा पूर्ण पाठिंबा आहे. मात्र बँकेबाबतचे हेवेदावे आणि राजकीय मतभेद बाजूला ठेवून सर्वांना सोबत घेऊन निवडणूक बिनविरोध करण्याचे आवाहन निलेश लंके यांनी केले आहे.