दुकानात चालले होते दोघे भाऊ, इतक्यात मागून भरधाव पिकअप आली अन्…

जितेंद्र पाटील, TV9 मराठी, पालघर : समृद्धी महामार्गावरील अपघाताची घटना ताजी असतानाच आज पालघरमध्ये दोन चिमुकल्यांच्या अपघाताची घटना घडली आहे. दुकानात चाललेल्या दोन चिमुकल्यांना भरधाव पिकअपने धडक दिल्याची घटना पालघरमधील मोडगाव येथे घडली आहे. या अपघातात दोन्ही चिमुकल्यांचा जागीच मृत्यू झाला आहे. दोघे सख्खी भावंडं होती. या घटनेमुळे गावात संतापाची लाट उसळली आहे. अपघातानंतर पिकअप चालक वाहनासह फरार झाला आहे. यामुळे रस्ते सुरक्षेचा प्रश्न पुन्हा एकदा ऐरणीवर आला आहे. पीडित कुटुंब आमदार श्रीनिवास वणगा यांचे नातेवाईक असल्याची माहिती मिळते.

कुटुंबीयांवर दुःखाचा डोंगर

पालघरमधील मोडगाव येथील मालकरी कुटुंबीय राहते. मालकरी यांची 11 वर्षाची मुलगी आणि 8 वर्षाचा मुलगा दोघेही दुकानात चालले होते. रस्त्याने चालत असतानाच मागून भरधाव वेगात आलेल्या पिकअप वाहनाने दोन्ही भावंडांना चिरडलं. यानंतर पिकअप चालक वाहन घेऊन फरार झाला. याप्रकरणी पालघर पोलीस ठाण्यात नोंद करण्यात आली असून, पोलीस आरोपी चालकाचा शोध घेत आहेत. दोन्ही मुलांच्या दुर्दैवी मृत्यूमुळे मालकरी कुटुंबावर दुःखाचा डोंगर कोसळला आहे.

नाशिकमध्ये कार-क्रुझर अपघातात 3 ठार, 10 जखमी

नाशिकच्या वणी-सापुतारा महामार्गावर खोरी फाट्याजवळ कार-क्रूझर यांच्यात समोरासमोर धडक झाली. या अपघातात कारमधील तिघांचा मृत्यू झाला. तर 10 जण जखमी झाले. अपघातात दोन्ही बाजूच्या वाहनांचे मोठ्या प्रमाणात नुकसान झाले. अपघाताची बातमी कळताच परिसरातील नागरिकांनी घटनास्थळी धाव घेत, मदतकार्य राबवून जखमींना बाहेर काढले. जखमींवर तातडीने वणी ग्रामीण रुग्णालयात प्राथमिक उपचार करून, पुढील उपचारासाठी नाशिक येथे हलविण्यात आले आहे.