Raj Thackersay : ‘समृद्धी महामार्ग साडे चार वर्षात पूर्ण, कोकणातील रस्ता 17 वर्षात नाही’; गडकरींना फोन केला तर म्हणाले…

खेड : महाराष्ट्राच्या राजकारणात झालेले भूकंप पाहता कोण-कोणासोबत युती करेल याचा काही नेम नाही. आता परत एकदा मंत्रिमंडळविस्तारारून सत्तेत सहभागी झालेल्या मंत्रिपदांसाठी रस्सीखेच पाहायला मिळणार आहे.  अशातच या सर्व राजकीय उलथापालथेवर महाराष्ट्र नवनिर्माण सेनेचे अध्यक्ष राज ठाकरे यांनी  बोलताना निशाणा साधला आहे. राज ठाकरे निवडणुकांच्या पार्श्वभूमीवर पक्षबांधणीसाठी चिपळून दौऱ्यावर आहेत. खेडमधील सभेत बोलताना रस्त्यांचा मुद्दा काढत सत्तेत असणाऱ्यांवर टीका केली.

निवडणुका कशासाठी लढवायच्या, भविष्यात आपल्या पिढ्या काय पाहणार याचा विचार करा फक्त. आज या लोकांनी चिखलकरून ठेवलाय, या चिखलात घालायचा की नवनिर्माण करायचं आहे. मला तुमची साथ हवी आहे माझी अपेक्षा आहे. खेड नगररिषदेच्या निवडणुका स्वबळावर लढाव्याच्या आहेत. खेडमध्ये निश्चित यश मिळणार, युत्या नको काही भानगडी नको, असं राज ठाकरे म्हणाले.

रस्त्याच्या विषयावर बोलताना राज ठाकरे यांनी समृद्धी महामार्गाकडे बोट दाखवत कोकणातील रस्त्यांच्या विषयाला हात घातला. समृद्धी महामार्ग जर साडे चार वर्षात पूर्ण होऊ शकतो मग कोकणातील रस्ता 17 वर्ष झालेत तरी का पूर्ण होऊ शकत नाही. नितीन गडकरींना फोन केला तेव्हा कंत्राटदार पळून गेला असं सांगण्यात आलं. हे सगळं लक्षात ठेवा, असंही राज ठाकरे यांनी सांगितलं.

दरम्यान, हा दौरा पक्ष बांधणी आणि नवीन पदाधिकारी नियुक्तीसाठी आहे, भाषणबाजीसाठी नाही. त्यासाठी एक सही संतापाची उपक्रम राबवला त्याला प्रतिसाद मिळाला असल्याचंही ठाकरेंनी सांगितलं. त्यासोबतच नगरपरिषदेच्या निवडणूका स्वबलावर लढायच्या आहेत. येणाऱ्या निवडणुकांमध्ये जनता राग व्यक्त करते का हे पाहायचं आहे, असंही राज ठाकरे म्हणाले.