धनंजय मुंडेंच्या केसाला जरी धक्का लागला तर.., मनोज जरांगे पाटलांना थेट मोठी धमकी, नेत्याच्या पोस्टने खळबळ
मोठी बातमी समोर येत आहे, मराठा आरक्षण आंदोलक मनोज जरांगे पाटील यांना सोशल मीडियावरून धमकी देण्यात आली आहे, या पोस्टमुळे खळबळ उडाली आहे.
मराठा आरक्षण आंदोलक मनोज जरांगे पाटील यांनी मराठा समाजाला आरक्षण मिळावं यासाठी मोठा लढा उभारला, त्यांनी अनेकदा त्यासाठी उपोषण देखील केलं आहे. अखेर त्यांच्या लढ्याला यश आलं, सरकारने राज्यात हैदराबाद गॅझेट लागू केलं. मात्र यामुळे राज्यात मराठा समाजाविरोधात ओबीसी समाज असा नवा वाद निर्माण झाला. राज्यातील सर्व ओबीसी नेते सरकारच्या या भूमिकेविरोधात एकवटल्याचं पहायला मिळालं. यावरून मनोज जरांगे पाटील यांच्यावर देखील त्यावेळी टीका करण्यात आली. मनोज जरांगे पाटील यांनी देखील ओबीसी नेत्यांवर विशेष: धनंजय मुंडे आणि छगन भुजबळ यांच्यावर जोरदार हल्लाबोल केला होता.
त्यानंतर बीड जिल्ह्याच्या मस्साजोग गावचे सरपंच संतोष देशमुख यांची हत्या झाली. या घटनेचे राज्यभरात पडसाद उमटले, नागरिकांमध्ये संतापाची लाट पहायला मिळाली. या प्रकरणात धनंजय मुंडे यांचा निकटवर्ती असलेला वाल्मिक कराड सध्या जेलमध्ये आहे. त्यावरून देखील मनोज जरांगे पाटील यांनी धनंजय मुंडे यांच्यावर जोरदार टीका केली होती.
तर त्यानंतर मनोज जरांगे पाटील यांनी आपल्याला मारण्याचा कट रचण्यात आल्याचा दावा देखील केला, या प्रकरणात अमोल खुणे या तरुणाला संशयीत आरोपी म्हणून अटक झाली होती, तो आता सध्या जामिनावर बाहेर आहे. दरम्यान या प्रकरणात देखील मनोज जरांगे पाटील यांनी धनंजय मुंडे यांच्यावर आरोप केले होते.
दरम्यान आता एक मोठी बातमी समोर आली आहे, ती म्हणजे थेट मनोज जरांगे पाटील यांना धमकी देणारी एक पोस्ट सोशल मीडियावर शेअर करण्यात आली आहे. समोर आलेल्या माहितीनुसार धनंजय मुंडे यांचे निकटवर्तीय आणि परळी बाजार समितीचे माजी सभापती गोविंद फड यांची ही पोस्ट आहे, ही पोस्ट सध्या चर्चेचा विषय बनली आहे. इंग्रजी भाषेमध्ये ही पोस्ट टाकण्यात आली आहे. ‘धनंजय मुंडे यांच्या केसाला पण धक्का लागला तर कार्यक्रम खल्लास.. जरांगे, सुरेश धस भंडारा लावून बोलतोय’ असा या पोस्टमधील मजकूर आहे. दरम्यान नेमकी अशी पोस्ट का केली यासंदर्भात माहिती भेटू शकलेली नाहीये, मात्र या पोस्टमुळे आता वातावरण तापण्याची शक्यता व्यक्त केली जात आहे.
