पुण्यातील कॅफेमध्ये रिलस्टारने केले तरुणावर सपासप वार, पोलिसांनी घडवली अद्दल

शिक्षणाचे माहेरघर म्हणून ओळखल्या जाणाऱ्या पुण्यात दिवसेंदिवस गुन्हेगारीचे सत्र वाढतच चालले आहे. पुणे शहरातील डेक्कन जिमखाना परिसरात मध्यरात्री झालेल्या एका हिंसक हल्ल्याने परिसरात खळबळ उडाली आहे. १५ ऑगस्टच्या पहाटे ‘फ्लाइंग जिप्सी’ हॉटेलसमोर एका १९ वर्षीय तरुणावर प्राणघातक हल्ला करण्यात आला. या हल्ल्यात प्रसिद्ध रीलस्टार तरुणीसह तिघांना पोलिसांनी अटक केली आहे.

नेमकं काय घडलं?

मिळालेल्या माहितीनुसार, जखमी तरुणाचे नाव अथर्व प्रमोद जगताप (वय १९, रा. आंबेगाव) आहे. शनिवारी पहाटे सव्वातीन वाजता अथर्व शिरोळे हॉटेलमधून बाहेर पडत असताना आरोपींनी त्याला अडवले. जुन्या वादाचा राग मनात बाळगून त्यांनी त्याला धमकावण्यास सुरुवात केली. घाबरलेला अथर्व जीव वाचवण्यासाठी पुन्हा हॉटेलच्या आत पळाला, पण आरोपींनी त्याचा पाठलाग केला आणि त्याच्या डोक्यात शस्त्राने वार केला. एवढ्यावरच न थांबता त्यांनी हॉटेलमधील खुर्ची त्याच्यावर फेकली आणि लाथाबुक्क्यांनी मारहाण केली.

डेक्कन पोलीस ठाण्यात तक्रार दाखल

या घटनेनंतर जखमी अथर्वने थेट डेक्कन पोलीस ठाण्यात तक्रार नोंदवली. पोलिसांनी तत्काळ कारवाई करत दोन तरुणींसह एकूण तिघांना अटक केली आहे. अटक झालेल्यांमध्ये प्रसिद्ध रीलस्टार माधवी कुंभार ( रा. हडपसर ), स्नेहल सोनके ( रा. पिंपळे गुरव ) आणि शार्दुल ओव्हाळ ( रा. हडपसर ) यांचा समावेश आहे. या तिघांशिवाय त्यांच्यासोबत असलेल्या इतर ७ ते ८ जणांवरही पोलीस ठाण्यात गुन्हा दाखल करण्यात आला आहे.

आधीपासून ओळख असूनही हल्ला

पोलिसांनी दिलेल्या माहितीनुसार, जखमी अथर्व जगताप आणि आरोपी तरुणींची (माधवी, स्नेहल) आधीपासून ओळख होती. काही महिन्यांपूर्वी सातारा येथे त्यांच्यामध्ये वाद झाला होता. त्याच जुन्या वादाचा राग मनात ठेवून आरोपींनी पुणे शहरात हा जीवघेणा हल्ला केला. या हॉटेल आणि परिसरात सातत्याने होणाऱ्या गोंधळ व मारहाणीच्या घटनांमुळे स्थानिक नागरिकही त्रस्त झाले आहेत. आता या प्रकरणी आणखी काही नवी माहिती मिळते का? याचा पोलिस शोध घेत आहेत.