लोकसभेसारखा दणका देऊ नका रे बाबांनो, लय वाईट वाटतंय, अजित दादांकडून खदखद व्यक्त, पाहा काय म्हणाले?

आगामी विधानसभा निवडणुकीच्या आधी राज्यात उपमुख्यमंत्री अजित पवार यांनी जनसन्मान यात्रा काढली आहे. या यात्रेलाही मोठ्या प्रमाणात प्रतिसाद मिळत असलेला पाहायला मिळत आहे. लोकसभेमध्ये अजित पवार गटाची एकच जागी आली होती. इतर जागांवर त्यांना पराभव पत्कारावा लागला होता. त्यामुळे विधानसभेआधी अजितदादा आपली संपूर्ण ताकद लावताना दिसत आहे. पुण्यातील आंबेगाव येथील सभेमध्ये बोलताना अजित पवारांनी लोकसभेला झालेल्या पराभवाची खदखद व्यक्त केली. त्यासोबतच झालेल्या चुकांची माफीसुद्धा मागितली.

अजित पवार काय म्हणाले?

लोकसभेसारखा दणका देऊ नका रे बाबांनो, लय वाईट वाटतंय. बेंबीच्या देठापासून अगदी घाम निघेपर्यंत ओरडून सांगतोय पण समोरच्यांनी देवळात वाजवायची घंटा माझ्या हाती दिली. अशी खंत वजा साद उपमुख्यमंत्री अजित पवारांनी मतदारांना घातली. आता तुमच्या कांदा, टोमॅटो वर कधीचं निर्यात बंदी आणणार नाही, पंतप्रधान नरेंद्र मोदींना तसं आवर्जून सांगितलं आहे. आता आम्ही सत्तेत असल्यानं हे झालं. तुमचा खासदार अमोल कोल्हेला हे सांगितलं तर ते काय म्हणणार? मी तर सत्तेत नाही. तेच जर तुम्ही शिवाजी आढळरावांना निवडून दिलं असतं तर? असं म्हणत अजित पवारांनी खंत व्यक्त केली.

सहकारी संस्थांच्या माध्यमातून इथल्या शेतकऱ्यांच्या जीवनात जनतेच्या जीवनात एक आर्थिक क्रांती घडवून आणलेली आहे आंबेगाव तालुक्याचा विकास झालेला आहे हे कोणी नाकारू शकत नाही. एकदम कोणी उठत आणि नेता व्हायला लागतं हे येड्या गाबळ्याचे काम नाही त्यासाठी 20 ते 25 वर्षे घासायला लागतात, असं म्हणत अजित पवारांनी देवदत्त निकम यांना नाव न घेता टोला लगावला.

काहीजण बोलतात ही योजना बंद होईल. आम्ही काम करणारी माणसे आहोत. मागच्या वेळेस एकदा वीज माफी केली होती त्यावेळी निवडणुका झाल्या आणि मला सांगितलं गेलं आता निवडणुका झाल्या योजना बंद. आता लोकसभे सारखा दणका दिला तर या योजना बंद आणि तुम्ही महायुतीला साथ दिली तर योजना सुरू राहणार, असंही अजित पवार म्हणाले.