दुचाकीवर १० सूर्यनमस्कार करणारा रायडर पाहिलात का?

बारामती : जागतिक सूर्यनमस्कार दिनानिमित्त (World Surya Namaskar) 14 जानेवारीला चालू मोटारसायकलवर 4 मिनिटे 20 सेकंदामध्ये सूर्यनमस्कार घातले म्हणून रोहित दिलीप शिंदे यांची इंडिया आणि एशिया बुक रेकॉर्डमध्ये नोंद झाली आहे. मोटार सायकलवर 10 वेळा सूर्यनमस्कार काढणारा जगातील पहिला मोटार सायकल रायडर (Motorcycle Rider) आहे. तो वयाच्या 16 वर्षापासून मोटार सायकल रेस करीत आलेला आहे. गेल्या 12 वर्षापासून मोटार सायकल रायडिंग करून आतापर्यंत 300 हून अधिक मोटार सायकल रायडिंग शो भारतात केले आहेत. मोटार सायकल रायडिंग करणे हा स्वत:पुरता मर्यादित राहिलेला नाही. त्याने अनेक इच्छुक युवकांना मोटार सायकल रायडिंगचे प्रशिक्षण (Riding Training) देण्यास सुरू केले आहे.

झारखंडमधील रायडिंगमध्ये प्रथम

मोटार सायकल स्टंटमध्ये मोटोक्रॉस, स्टंट रायडिंग ऑफ रोडिंग, ऍटोक्रॉस आणि रॅलीमध्ये उत्तुंग कामगिरी केली आहे. नुकत्याच झालेल्या झारखंडमधील रांची येथे मोटार सायकल रायडिंगमध्ये प्रथम क्रमांक मिळवून नावलौकिक केला आहे. त्यामध्ये देशातील 70 रायडर्सनी भाग घेतला होता.

ग्लोबल हेडक्वॉर्टर स्पर्धेत भाग घेणार

केटीएम कंपनीच्या आरसी 390 सीसी गाडीवर रेस जिंकून चेन्नई येथे होणार्‍या ट्रॅक रेसिंग नॅशनल स्पर्धेसाठी रोहितची निवड झाली आहे. यामध्ये प्रथम दहामध्ये येणार्‍यास ऑस्ट्रिया केटीएम ग्लोबल हेडक्वॉटर स्पर्धेत भाग घेता येणार आहे, असे बजाज ऍटो लिमिटेडचे अध्यक्ष सुमित नारंग यांनी सांगितले.

हैद्राबादमध्ये प्रथम क्रमांक

मोटार सायकल रायडिंगमध्ये 2018 मध्ये रोहित महाराष्ट्रात पहिला व केरळमध्ये देशात तिसरा आला होता. 2019 मध्ये हैद्राबादमध्ये प्रथम क्रमांक मिळविला होता. यापूर्वी तामिळनाडू कोईमतूरमध्ये झालेल्या मोटार सायकल रायडिंगमध्ये वेगवेगळ्या तीन स्पर्धेमध्ये रेकॉर्ड करून बारामतीतील रोहित दिलीप शिंदे यांनी देशात पहिला क्रमांक मिळविला होता.

सीआरएफ कंपनीने स्टंट वॉलफेअर राष्ट्रीय स्पर्धा आयोजित केली होती. यामध्ये फ्री स्टाईल स्टंट रायडिंग ऑबस्टूकल टाइम चॅलेंज व लास्ट मॅन स्टँडिंग या तिन्ही स्पर्धामध्ये रोहितने अव्वलस्थान पटकाविले होते. मोटारसायकल एका चाकावर उचलून जास्तीत-जास्त गाडी गोल फिरविण्याची स्पर्धा होती. केवळ 8 मिनिटे 28 सेकंद एवढ्या कालावधीत तिन्ही स्पर्धेत रेकॉर्ड केले होते. तिन्ही स्पर्धेत एकत्रित रेकॉर्ड करणारा रोहित शिंदे हा स्टंट रायडिंगमध्ये पहिला खेळाडू ठरला आहे.