पुणेकरांना महानगरपालिकेकडून मिळणार २५० कोटी रुपये, काय आहे कारण?

पुणे : पुणे शहरातील नागरिकांसाठी चांगली बातमी आहे. पुणे शहरातील नागरिकांना धनलाभ होणार आहे. पुणे महानगरपालिका पुणेकरांना २५० कोटी रुपये देणार आहे. राज्य मंत्रिमंडळाने घेतलेल्या निर्णयानंतर ही भेट पुणेकरांना मिळणार आहे. या निर्णयामुळे पुणेकरांचा फायदा होणार आहे. एकूण चार टप्प्यात पुणे शहरातील नागरिकांना पैसे मिळणार आहे. यासंदर्भातील प्रक्रिया पुणे महानगरपालिकेने सुरु केली आहे. यामुळे पुणेकरांसाठी ही आनंदाची बातमी आहे.

का मिळणार पैसे

पुणे महापालिकेने स्वतःच्या मालकीच्या घरात राहत असल्यास नागरिकांना घरपट्टीमध्ये ४० टक्के सवलत दिली आहे. पुणे महानगरपालिकेच्या हद्दीतील मालमत्ता कर आकारणी करतांना वार्षिक भाड्यातून आता 15% सवलत मिळणार आहे. यापूर्वी ही सवलत 10% होती. ही सवलत २०१९ पासून मिळणार आहे. यामुळे मिळकत कराची २०१९ पासून शंभर टक्के रक्कम भरणाऱ्या पुणेकरांना ४० टक्के रक्कम परत मिळणार आहे. ही रक्कम एकूण २५० कोटी रुपये आहे.

ही होती मागणी

पुणे महानगरपालिकेने 28 ऑगस्ट, 2019 रोजी पुन्हा एक मुख्य सभा ठराव पारित करुन या सवलतीमुळे वसुली करावयाची थकबाकीची रक्कम पुर्वलक्षी प्रभावाने करु नये व 2019 पर्यंत ज्या पध्दतीने सवलत देण्यात येत होती ती तशीच यापुढेही सुरू राहावी अशी मागणी शासनाकडे केली होती.

त्याअनुषंगाने 01 एप्रिल, 2023 पासून पुणे महानगरपालिकेच्या हद्दीतील मालमत्ता कर आकारणी करतांना वार्षिक भाड्यातून 10% ऐवजी 15% सवलत आणि मालमत्ताधारक स्वत: राहण्यासाठी मालमत्तेचा वापर करत असल्यास त्यांना वार्षीक मालमत्ता करपात्र रक्कम निश्चित करतांना 40% सवलत लागू होणार आहे. तसेच 31 मार्च, 2023 पर्यंतच्या फरकाच्या रकमेची वसुली माफ करण्याचा निर्णय देखील घेण्यात आला आहे.

कशी मिळणार रक्कम

पुणेकरांना चार टप्प्यात मिळकत कराची रक्कम मिळणार आहे. २०१९ नंतर शंभर टक्के रक्कम भरणाऱ्या सर्वांना ही रक्कम मिळणार आहे. जवळपास 250 कोटी रुपये महापालिका परत करणार आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या उपस्थितीत झालेल्या बैठक १९ एप्रिल रोजी हा निर्णय घेण्यात आला होता. पुण्याचे पालकमंत्री व उच्च व तंत्रशिक्षण मंत्री चंद्रकांत पाटील यांनी यासाठी पुढाकार घेतला होता.

हे ही वाचा

खारघर घटनेनंतर तापमान देण्याच्या प्रक्रियेत मोठा बदल, आता हवामान विभाग नवीन प्रणाली अवलंबणार