बारामती लोकसभेसाठी अजित पवार यांचा उमेदवार ठरला ? प्रचाराचा रथ फिरणार

प्रदीप कापसे, पुणे दि. 16 फेब्रुवारी 2024 | लोकसभा निवडणुकीचे वारे देशात वाहू लागले आहे. सर्वच राजकीय पक्षांनी लोकसभेची तयारी चालवली आहे. उमेदवारी जाहीर झालेली नसली तरी काही ठिकाणी उमेदवार निश्चित झाले आहेत. त्यानुसार प्रचार सुरु झाला आहे. संपूर्ण राज्याचे नव्हे तर देशाचे लक्ष लागलेल्या बारामती मतदार संघातील लढत चांगलीच रंगणार आहे. कारण बारामतीमध्ये पवार कुटुंबियांमध्येच लढत होणार आहे. राष्ट्रवादीतील शरद पवार गटातील उमेदवार सुप्रिया सुळे पुन्हा लढणार आहे. तसेच महायुतीकडून अजित पवार गटास ही जागा मिळणार आहे. महायुतीकडून अजित पवार गटाकडून कोण असणार? हे निश्चित झाल्याचे संकेत मिळत आहे. बारामतीमधून अजित पवार यांच्या पत्नी सुनेत्रा पवार यांची उमेदवारी जवळपास निश्चित झाली आहे.

प्रचाराचा रथ तयार, कार्याची माहिती

बारामती लोकसभा मतदार संघात सुनेत्रा अजित पवार यांची उमेदवारी जवळपास निश्चित झाल्याचे संकेत मिळत आहे. बारामतीमध्ये केवळ अधिकृत घोषणा बाकी आहे. बारामती परिसरात सुनेत्रा पवार यांच्या माहिती व कार्याचा आढावा घेणारा प्रचार रथ फिरू लागला आहे. त्यासाठी गाडीवर फ्लॅक्स लावले आहे. त्यात सुनेत्रा पवार यांचा मोठा फोटो घेतला आहे. तसेच अजित पवार यांचाही फोटो आहे.

सुनेत्रा पवार यांनी अष्टविनायकाचे घेतले दर्शन

सुनेत्रा पवार सध्या चांगल्याच सक्रीय झाल्या आहेत. त्यांनी राहुल कुल यांच्या घरी सदिच्छा भेट घेतली. राहुल कुल हे भाजपचे आमदार तर कांचन कुल 2019 साली भाजपच्या उमेदवार होत्या. दौंड तालुक्यातील राहू येथे सुनेत्रा पवार यांनी कुल कुटुंबियांची भेट घेतली.

उपमुख्यमंत्री अजित पवार यांच्या पत्नी सुनेत्रा पवार यांनी अष्टविनायक महागणपती रांजणगाव येथे दर्शन घेत बाप्पाची आरती केली. गेल्या काही दिवसांपासून सुनेत्रा पवार यांचा शिरूर लोकसभा मतदारसंघातील दौरा वाढला आहे. अजित पवार यांनी अमोल कोल्हे यांना पराभूत करणार असे आव्हान दिल्यानंतर सुनेत्रा पवारही शिरूर लोकसभा मतदारसंघात सध्या फिरताना दिसत आहे. अजित पवार आणि सुनेत्रा पवार यांचा मुलगा पार्थ पवार यांना शिरूर लोकसभा मतदार संघातून निवडणुकीच्या मैदानात उतरवणार असल्याची चर्चा आहे.