सध्या पावसाळी पर्यटन विसरा, पुणे जिल्ह्यातील पर्यटनस्थळ बंद, महाबळेश्वरलाही…

पुणे जिल्ह्यात मुसळधार पाऊस सुरु आहे. पावासाचा रेड अलर्ट गुरुवारी दिला आहे. तसेच येत्या आठवड्यात पाऊस सुरु राहणार आहे. पुणे जिल्ह्यातील पावसामुळे सर्व पर्यटन स्थळावर बंदी आणण्यात आली आहे. पुढील सूचना येईपर्यंत पुणे जिल्ह्यातील सर्वच पर्यटनस्थळे बंद राहणार आहे. यामुळे तुमचा मान्सूनचा पर्यटन करण्याचा बेत असल्यास तो रद्द करावा लागणार आहे. पर्यटकांच्या सुरक्षितेसाठी जिल्हा प्रशासनाने हा निर्णय घेतला आहे.

पुणे शहरात गेल्या ३२ वर्षांमधील सर्वाधिक पाऊस झाला आहे. ताम्हिणी घाटात गेल्या २४ तासांत विक्रमी पाऊस झाला आहे. या ठिकाणी तब्बल ५५६ मिलिमीटर पावसाची नोंद करण्यात आली. पुणे जिल्ह्यात खडकवासला धरण, सिंहगड, लोणावळा-खंडाळा, मावळ असे अनेक ठिकाणी पर्यटक पावसाळी पर्यटनाचा आनंद घेण्यासाठी जातात.

लोणावळ्यात सर्व धबधबे प्रवाहीत, पण बंदी

लोणावळ्यातील सहारा पूल, भुशी धरण, लाईन्स पॉईंट या परिसरामध्ये पावसाचा अक्षरशः कहर पाहिला मिळत आहे. या भागांत असणारे धबधबे मोठ्या प्रमाणात प्रवाहित होऊन वाहत आहे. या ठिकाणी कोणत्याही प्रकारची जीवितहानी व धोका निर्माण होऊ नये याकरिता सुरक्षेच्या कारणास्तव या सर्व परिसरामध्ये पर्यटकांना जाण्यास बंदी घालण्यात आली आहे. लोणावळा धरणाच्या पायथ्याशी लोणावळा पोलिसांनी चेक पोस्ट लावत सर्व पर्यटक वाहने व इतर सर्व प्रकारच्या वाहनांना पुढे जाण्यास मज्जाव करण्यात आला आहे. मावळ प्रांताधिकारी यांनी 25 जुलै ते 29 जुलै दरम्यान मावळ व मुळशी तालुक्यातील सर्व पर्यटन स्थळे सुरक्षेच्या कारणास्तव बंद ठेवण्याबाबत आदेश निर्गमित केले आहेत.

हे सुद्धा वाचा

मुकेश अंबानी यांच्यापेक्षाही जास्त खर्च, या व्यक्तीने दिली होती जगातील सर्वात महागडी पार्टी

“मी अजित पवार, महाराष्ट्र राज्याचा मुख्यमंत्री म्हणून शपथ घेतो की…” पुण्यात नेमके काय घडले?

वाघनखांचा इतिहास अन् सातारा ते लंडन प्रवासाची रंजक कथा

वारी म्हणजे काय…कधीपासून सुरु झाली वारी, दिंडी अन् वारीत फरक तरी काय?

सातारा जिल्ह्यात 12 पॉईंटवर पर्यटकांना जाण्यास बंदी

सातारा जिल्ह्यातील महाबळेश्वरमध्ये मुसळधार पाऊस पडत असल्यामुळे जिल्हा प्रशासनाने या ठिकाणचे प्रसिद्ध ऑर्थर सीट पॉईंट परिसरातील इतर 12 पॉईंटवर पर्यटकांना जाण्यास बंदी केली आहे. याबरोबरच मुसळधार पावसामुळे या भागात प्रसिद्ध असणाऱ्या लिंगमळा धबधब्याकडे जाणाऱ्या रस्त्यावर पाणी आल्यामुळे पर्यटकांसाठी बंद केला आहे. कोणताही अनुचित प्रकार घडू नये यासाठी या उपायोजना केला असल्याची माहिती जिल्हाधिकारी जितेंद्र डूडी यांनी दिले आहे.

लिंगमळा धबधब्यावर बंदी

महाबळेश्वरचा प्रसिद्ध असा लिंगमळा धबधबा वेण्णा नदीवरील पाण्याचा प्रवाह जास्त वाढल्याने पर्यटनासाठी बंद करण्यात आला आहे. तसेच धोकादायक ठिकाणी काटेरी तार व काटेरी झुडपे टाकून बंद करण्यात आले आहे. महाबळेश्वरमध्ये मुसळधार पाऊस पडत असल्यामुळे नगरपालिका प्रशासनाने देखील ऑर्थोसीट पॉईंट परिसरातील इतर 12 पॉईंटवर पर्यटकांना जाण्यास बंदी केली आहे. मुसळधार पावसामुळे या भागात कोणताही अनुचित प्रकार घडू नये, यासाठी विशेष काळजी घेतली जात आहे. सध्या लिंगमळा धबधबा ओसंडून वाहत असल्यामुळे डोंगर कपारीतून पडणारा हा धबधबा डोळ्याचे पारणे फेडत आहे.