भाजपमधून एकनाथ शिंदेंना संपवण्याचा विडा कोणी उचलला? शिंदे गट आक्रमक, रामदास कदमांचा थेट सवाल

मराठा आरक्षण आंदोलक मनोज जरांगे पाटील यांनी गुरुवारी पत्रकार परिषद घेतली, या पत्रकार परिषदेमध्ये त्यांनी एक ऑडिओ क्लिप ऐकवली.  उपमुख्यमंत्री एकनाथ शिंदे यांनी मनोज जरांगे पाटील यांना देण्यासाठी भाजपकडून पाचशे कोटी रुपये घेतले, ते खासदार श्रीकांत शिंदे यांच्या मार्फत देण्यात आले, असं या कथित ऑडिओ क्लिपमध्ये म्हटलं होतं. या ऑडिओ क्लिपमुळे राजकीय वर्तुळात मोठी खळबळ उडाली आहे. विरोधकांकडून सरकारच्या कोंडिंचा प्रयत्न सुरू झाला आहे. काँग्रेसचे प्रदेशाध्यक्ष हर्षवर्धन सपकाळ यांनी तर थेट एकनाथ शिंदे आणि श्रीकांत शिंदे यांच्या अटकेचीच मागणी केली आहे, तसेच या ऑडिओ क्लिपची इडीकडून चौकशी झाली पाहिजे, असंही त्यांनी म्हटलं आहे. दरम्यान या सर्व पार्श्वभूमीवर आता शिवसेना शिंदे गटाने आक्रमक भूमिका घेतली आहे. शिवसेना शिंदे गटाचे नेते रामदास कदम यांनी पत्रकार परिषद घेऊन मनोज जरांगे पाटील तसेच भाजपवर जोरदार हल्लाबोल केला आहे.

एकनाथ शिंदे मोठा विश्वास ठेवून भाजपसोबत आले, आता भाजपलाही एकनाथ शिंदे यांची भीती वाटायला लागली आहे का? एकनाथ शिंदे यांना संपवण्याचा विडा भाजपमधून कोणी उचलला असा थेट सवालच आता रामदास कदम यांनी केला आहे. दरम्यान पुढे बोलताना ते म्हणाले की,  कशा पद्धतीने भाजपचा प्लान चालतो, पैसे पक्षाकडून द्यायचे नाही पैसे परस्पर द्यायचे, तुमच्या प्रवीण दरेकर यांचं देखील नाव आलं आहे.  याचे उत्तर भाजपला सुद्धा द्यावे लागेल. एकनाथ शिंदे तुमच्या सोबत आल्यानंतर आता शिंदे यांची भीती तुम्हाला देखील वाटायला लागली आहे का? एकनाथ शिंदेंचा गळा कापण्याचं काम भाजपकडून होत आहे का असा प्रश्न आम्हाला पडत आहे.

त्या क्लिपची चौकशी झाली पाहिजे, यामागे कोण आहे? एकनाथ शिंदेंना बदनाम करण्यासाठी क्लिप काढून कटकारस्थान नेमकं कोण करत आहे? दूध का दूध पानी का पानी झालं पाहिजे.  मी स्वतः नरेंद्र मोदी, अमित शहा , मोहन भागवत, देवेंद्र फडणवीस यांना पत्र पाठवलं आहे. अस्थिनमधील   साप कोण आहे? हे समजलं पाहिजे,  एकनाथ शिंदेंना संपवण्याचा विडा भाजपमध्ये घेणारे कोण आहेत? हे लोकांसमोर आलं पाहिजे, असं यावेळी कदम यांनी म्हटलं आहे.