सर्वात मोठी बातमी! संतोष देशमुख यांना तब्बल तीन तास अमानुष मारहाण, मारहाणीचे 15 व्हिडीओ आणि 8 फोटो समोर
संतोष देशमुख यांच्या हत्याप्रकरणात सर्वात मोठी बातमी समोर आली आहे, 9 डिसेंबरला संतोष देशमुख यांना आरोपींनी अमानुष मारहाण केली, त्याचे तब्बल 15 व्हिडीओ आणि आठ फोटो सीआयडीच्या हाती लागले आहेत.
9 डिसेंबरला बीड जिल्ह्यातल्या मस्साजोगचे सरपंच संतोष देशमुख यांचं अपहरण करण्यात आलं होतं, त्यानंतर त्यांची हत्या करण्यात आली. या घटनेनं राज्यभरात खळबळ उडाली, वातावरण चांगलंच तापलं. आता या प्रकरणात सीआयडीकडून आरोप पत्र दाखल करण्यात आलं आहे. या आरोपत्रातून संतोष देशमुख यांच्या हत्येचा संपूर्ण घटनाक्रम समोर आला आहे. आता त्यानंतर या प्रकरणातील मोठी बातमी समोर आली आहे.
ती म्हणजे 9 डिसेंबरला संतोष देशमुख यांचं अपहरण करण्यात आलं, त्यानंतर तब्बल तीन तास आरोपींनी त्यांना अमानुष मारहाण केली. देशमुख यांना मारहाण करत असताना आरोपींनी या घटनेचे 15 व्हिडीओ आणि 8 फोटो काढले. हे सर्व फोटो आणि व्हिडीओ सीआयडीनं आरोपी महेश केदारच्या फोनमधून जप्त केले आहेत. या व्हिडीओमध्ये सुदर्शन घुलेसह इतर आरोपी हे संतोष देशमुख यांना मारहाण करताना दिसून येत आहेत.
असा आहे संपूर्ण घटनाक्रम
वाल्मिक कराड हाच संतोष देशमुख यांच्या हत्याकांडातील मास्टरमाईंड असल्याचं सीआयडीनं दाखल केलेल्या आरोपपत्रातून समोर आलं आहे. खंडणी प्रकरणात संतोष देशमुख यांनी अडथळा आणल्यामुळे त्यांची हत्या, करण्यात आली, असं या आरोपपत्रात म्हटलं आहे. 29 नोव्हेंबरला केजच्या कार्यालयात वाल्मिक कराड, चाटे, सुदर्शन घुले, प्रतिक घुले, सुधीर सांगळे आणि कृष्णा आंधळे यांनी बैठक घेतली, या बैठकीमध्येच संतोष देशमुख यांच्या हत्येचा कट रचण्यात आला.
त्यानंतर 9 डिसेंबरला संतोष देशमुख यांची गाडी अडवून त्यांचं अपहरण करण्यात आलं, त्यानंतर त्यांना अमानुष मारहाण करण्यात आली, त्यांच्या मारहाणीचा व्हिडीओ आता समोर आली आहे, तब्बल 15 व्हिडीओ आणि 8 फोटो सीआयडीने आरोपी महेश केदारच्या फोनमधून जप्त केले आहेत. या व्हिडीओमध्ये सुदर्शन घुलेसह इतर आरोपी संतोष देशमुख यांना मारहाण करताना दिसून येत आहेत. याच मारहाणीमध्ये संतोष देशमुख यांचा मृत्यू झाला. संतोष देशमुख यांच्या हत्येपूर्वी आठ डिसेंबर 2024 ला चाटे घुले आणि अन्य चांदुर फाट्याजवळील हॉटेल तिरंगा इथं भेटले, त्यावेळी घुलेनं कराडचा निरोप दिला. संतोष देशमुख आडवा आला तर त्याला कायमचा धडा शिकवा, असं त्याने म्हटलं होतं.
