Sharad Pawar : फक्त बोलून नाही तर करुन दाखवलं, शरद पवारांचा मोठा निर्णय, दुष्काळग्रस्त गावासाठी थेट चेक दिला

राज्यामध्ये यंदा दुष्काळ घोषीत करण्यात आला आहे. राज्यातील ३५८ तालुंक्यापैकी तब्बल ३०५ तालक्यांमध्ये दुष्काळाची भीषण परिस्थिती आहे. याच पार्श्वभूमिवर ज्येष्ठ नेते शरद पवार यांनी सोलापूरच्या माढा तालुक्यातुन दुष्काळ पाहणी दौर्याला आजपासून सुरुवात केली आहे. ते शेतकऱ्यांच्या भेटी घेत आहेत. पंढरपूरनंतर आज ते सोलापूर माढामध्ये पोहोचले. यावेळी त्यांनी पाणीटंचाईची भीषणता लक्षात घेऊन ५० लाख रूपयांची मदत देण्याचा मोठा निर्णय घेतला आहे.

फळबागा नुकसाना संदर्भात लवकरात लवकर मदत करावी, दुष्काळी तीव्रता लक्षात घेता तीन दिवसीय अधिवेशन बोलवावे आणि उपाययोजना कराव्यात, अशा अनेक मागण्याचे पत्र पवारांनी मुख्यमंत्री देवेंद्र फडणवीस यांना लिहिलं आहे. दुष्काळी भागातील समस्या खासदार सुप्रिया सुळे पंतप्रधान यांच्याकडे मांडणार आहेत. दुष्काळ संदर्भात अनेक अडचणी आहेत. रस्त्याने येताना पाहिले की सर्व पिके वाळून गेली आहेत, माढा तालुक्यातील ज्या समस्या मांडल्या आहेत, त्या सोडविण्यासाठी आमचा प्रयत्न राहणार आहे, असंही यावेळी पवार म्हणाले. 1972 ला असाच दुष्काळ होता आणि मी या जिल्ह्याचा पालकमंत्री होतो. सरकारकडून आम्ही त्याकाळी शेतकऱ्यांना जमेल अशी मदत केली होती.

माढ्याच्या तुळशी गावाला शरद पवारांनी भेट देऊन गावाची भीषण पाणी टंचाई जाणून घेतल्यानंतर पवारांनी ५० लाखांचा धनादेश देऊन गावाला मदत जाहीर करुन मदतीचा हात दिला. मागील अनेक वर्षापासून गावची पाणी टंचाई मिटली नसल्याने तुळशी गावकर्यानी गाव विकायला काढले होते. पवारांनी गावाची दुष्काळाची दाहकता पाहून बघ्याची भूमिका न घेता थेट ५० लाखांची आर्थीक मदत दिल्याने गावकर्यानी पवारांचे आभार मानले आहेत.

दरम्यान, या दुष्काळामध्ये सरकार शेतकऱ्यांच्यासोबत आहे, असं म्हणत सरकारने शेतकऱ्यांना दिवाळीपूर्वी अग्रीम मदत म्हणून ५ हजार रुपयांची मदत जाहीर केली आहे. राज्यात पावसाअभावी शेतीचे मोठे नुकसान झाले असून, अनेक भागांत पिण्याचे पाणी आणि जनावरांच्या चाऱ्याचा प्रश्न गंभीर बनला आहे. पवारांच्या दौऱ्याला बारामतीतून सुरुवात झाली असून, पुढील तीन दिवस सोलापूर, धाराशिव, बीड आणि अहिल्यानगर या जिल्ह्यांतील परिस्थितीचा पवार आढावा घेणार आहेत.