सर्वात मोठी बातमी, शिवसेनेच्या आमदार अपात्रतेच्याआधी पक्षाचं नाव आणि चिन्हावर निकाल लागणार?
शिवसेना आमदार अपात्रतेच्या प्रकणावर आता सुप्रीम कोर्टात लवकरच निकाल लागण्याची शक्यता आहे. सुप्रीम कोर्टाने याआधी विधानसभा अध्यक्षांना याबाबत सुनावणी घेऊन निकाल देण्याचा आदेश दिला होता. पण विधानसभा अध्यक्षांच्या निकालास ठाकरे गटाने सुप्रीम कोर्टात पुन्हा आव्हान दिलं आहे. याच प्रकरणी आता लवकरच निकाल लागण्याची शक्यता आहे.
महाराष्ट्राच्या राजकारणात अजूनही काहीही घडू शकतं. कारण विधानसभा निवडणूक तोंडावर आहे. लोकसभेची निवडणूक नुकतीच पार पडली आहे. या निवडणुकीत महायुतीला सर्वाधिक फटका बसला आहे. तर महाविकास आघाडीला सर्वात चांगलं यश मिळालं. त्यामुळे आगामी विधानसभा निवडणुकीत महाविकास आघाडीचे तीनही घटकपक्ष एकत्रितपणे निवडणुकीला सामोरे जाणार आहेत. विशेष म्हणजे शिवसेना ठाकरे गटाचे प्रमुख उद्धव ठाकरे हे आज कुटुंबासह दिल्लीला रवाना झाले आहेत. उद्धव ठाकरे यांचा तीन दिवसांचा दिल्ली दौरा आहे. या दौऱ्यात ते काँग्रेस, आप आणि टीएमसी पक्षाच्या दिग्गज नेत्यांना भेटणार आहेत. ठाकरेंच्या या दौऱ्यात कदाचित काँग्रेसच्या हायकमांडसोबत महाराष्ट्रातील विधानसभेच्या जागावाटपावर चर्चा होण्याची शक्यता आहे. या सर्व घडामोडी एकीकडे घडत असताना आता सुप्रीम कोर्टातही मोठ्या घडामोडी घडणार असल्याचे संकेत मिळत आहेत.
महाराष्ट्रात विधानसभेची निवडणूक तोंडावर असल्याने सुप्रीम कोर्टाला शिवसेना आमदार अपात्रता प्रकरणावर निकाल देणं अनिवार्य असणार आहे. विशेष म्हणजे येत्या 14 ऑगस्टला शिवसेना आमदार अपात्रता प्रकरणावर सुनावणी होण्याची शक्यता आहे. यावेळी काय घडू शकतं, याबाबत वकील असीम सरोदे यांनी सर्वात मोठा दावा केला आहे.
असीम सरोदे यांचा नेमका दावा काय?
“शिवसेना आमदार अपात्रता प्रकरणी एक मोठी बातमी समोर येत आहे. शिवसेना आमदार अपात्रतेच्या प्रकरणावर येत्या 14 ऑगस्टला सुनावणी होण्याची शक्यता आहे. या सुनावणीत शिवसेना पक्ष आणि चिन्हं संदर्भात सुनावणी होण्याची शक्यता आहे. या सुनावणीबाबत शिवसेना उद्धव बाळासाहेब ठाकरे पक्षाची बाजू मांडणारे वकील असीम सरोदे यांनी मोठा दावा केला आहे. येत्या 14 ऑगस्टला सुप्रीम कोर्ट थेट निकाल देण्याची शक्यता आहे. शिवसेना पक्ष हा उद्धव ठाकरे यांना मिळेल. तर धनुष्यबाण चिन्ह हे गोठवलं जाईल”, असा मोठा दावा असीम सरोदे यांनी केली.
असीम सरोदे यांनी आणखी एक मोठा दावा केला. “शिवसेना आमदार अपात्रतेच्या निकालाआधी पक्षाचा निकाल लागेल. विधानसभा निवडणुकीआधी सुप्रीम कोर्टाला तो निकाल लावावा लागेल. अन्यथा सुप्रीम कोर्टाची नाचक्की होईल, असं मोठं वक्तव्य असमी सरोदे यांनी केलं. “शिवसेना आमदार अपात्रता प्रकरण जाणूनबुजून लांबणीवर टाकलं जातंय का? हा प्रश्न आहे”, असंदेखील मत असीम सरोदे यांनी व्यक्त केलं आहे.
