प्रदीप कदमला त्रास का देतो? बोल घालू का गोळ्या… लोडेड पिस्तुल डोक्याला लावून जबर मारहाण; सोलापूर हादरले

राज्यातील गुन्हेगारीच्या घटना दिवसेंदिवस वाढताना दिसत आहेत. काही भागात तर गुन्हेगारांच्या मनात काहीच भय राहिलेले दिसत नाही. दिवसाढवळ्या हल्ले होत आहेत. महिलांचे विनयभंग केले जात आहेत. चोऱ्या होत आहेत. एवढेच कशाला आता पेट्रोल पंपावरही मारामारी, चाकू हल्ले होताना दिसत आहे. भय नावाची गोष्टच उरलेली नाही. सोलापुरात तर दोन गुन्हेगारांनी लोडेड पिस्तुल डोक्याला लावून एकाला जबर मारहाण केली. या घटनेमुळे एकच खळबळ उडाली असून आरोपीला जबर शिक्षा देण्याची मागणी होत आहे.

मित्राला त्रास देत असल्याचे सांगत करमाळा तालुक्यातील कंदर येथील दोघांनी एकाला पिस्टल आणि कोयत्याचा धाक दाखवत इतर तिघांना बोलावून मारहाण केली. या दोघांनी जातीवाचक शिवीगाळ आणि अपमानास्पद वागणूक दिली आहे. याप्रकरणी दोघा मित्रांसह इतर तिघांवर गुन्हा दाखल झाला आहे. याबाबत कंदर येथील आनंद अशोक खांडेकर (वय-36 वर्षे) यांनी फिर्याद दिली आहे.

पाया पडायला लावले

कंदर गावातील मराठी शाळेजवळ असताना स्वप्निल देवडकर आणि प्रदिप कदम या दोघांनी त्यांना स्विफ्ट कारमध्ये बसवले. त्यानंतर स्वप्निलने आनंद खांडेकर यांच्या डोक्याला लोड केलेली पिस्टल लावून ‘प्रदिप कदमला का त्रास देतो, बोल गोळ्या घालू’ असे म्हणत मारहाण करण्यास सुरुवात केली. यानंतर स्वप्नीलने फिर्यादी खांडेकर यांना जातीवाचक शिवीगाळ करत प्रदीपच्या पाया पडण्याचा आग्रह धरला. आनंद यांनी पाया पडण्यास नकार दिल्यानंतर स्वप्निलने त्याच्या भाच्यासह इतर दोघांना तेथे बोलवून त्यांच्यावर कोयता उगारून प्रदीपला आणि गाडीत असणाऱ्या दोन लहान मुलांच्या पाया पडण्यास भाग पाडले.

तोंडावर लघवी करण्याची धमकी

त्यानंतर स्वप्नीलने फिर्यादी आनंद खांडेकर यांना गाडीमध्ये बसवले. त्याला त्याच्या घरी नेऊन लहान मुलांना तोंडावर लघवी करण्यास सांगण्याची धमकी देत त्याच्या आई-वडिलांच्याही पाया पडण्यास भाग पाडले. यानंतर प्रदीपकडे वाकड्या नजरेने पाहिल्यास गोळ्या घालण्याची धमकी दिली. पोलिसात अॅट्रोसिटीची तक्रार दिली तरी माझे कोणी काहीच वाकडे करू शकणार नाही, अशी धमकीही त्याने दिली.

करमाळा पोलिसांनी स्वप्निल देवडकर, प्रदिप कदम, स्वप्निलचा भाचा आणि दोन अनोळखी लोकांविरुद्ध अॅट्रासिटीचा गुन्हा दाखल केला असून करमाळा पोलिसांनी स्वप्निल देवडकर या आरोपीला ताब्यात घेतले आहे. उपविभागीय पोलिस अधिकारी अंजना कृष्णा तपास करत आहेत.