Aaditya Thackeray | वाघनखांवरुन आदित्य ठाकरेंनी शिंदे-फडणवीस सरकारला कुठला प्रश्न विचारला? VIDEO

मुंबई : लवकरच वाघनखं भारतात आणण्यात येणार आहेत. ब्रिटनच्य़ा व्हिक्टोरिया अलबर्ट संग्रहालयामध्ये ही वाघनखं आहेत. येत्या 3 ऑक्टोबरला राज्याचे सांस्कृतीक मंत्री सुधीर मुनगंटीवार ब्रिटनला जाणार आहेत. त्यावेळी व्हिक्टोरिया अलबर्ट संग्रहालयासोबत एक करार करण्यात येईल. येत्या 16 नोव्हेंबरला ही वाघनखं मुंबईत येणार आहेत. तीन वर्ष ही वाघनखं भारतात असतील. ही वाघनखं आणण्यापासून ते प्रदर्शनात मांडण्याच नियोजन करण्यासाठी एक खास समिती बनवण्यात आली आहे. ही वाघनखं महाराष्ट्राचा श्रीमंत इतिहास, पराक्रमाची साक्षीदार आहेत. प्रतापगडाच्या पायथ्याशी छत्रपती शिवाजी महाराजांनी स्वराज्यावर चालून आलेल्या अफजल खानाचा कोथळा बाहेर काढला होता. धिप्पाड शरीरयष्टी असलेल्या अफजल खानाला संपवण्यासाठी छत्रपती शिवाजी महाराजांनी वाघनखांचा वापर केला होता.

देशभरातील शिवप्रेमींमध्ये या वाघनखांच्या दर्शनाची आतुरता आहे. याची देही, याची डोळा ही वाघनखं पाहायची आहेत. त्यामुळे वाघनखं परत भारतात आणणार ही शिवप्रेमींसाठी आनंदाची बातमी आहे. आता या वाघनखांवरुन ठाकरे गटाचे नेते आदित्य ठाकरे यांनी एक मुद्दा उपस्थित केलाय. त्यांनी एक प्रश्न विचारलाय. “वाघनखं परत आणणार असं आम्हाला सांगितलं होतं. राज्य सरकारकडून यावर मला स्पष्टीकरण पाहिजे. छत्रपती म्हणजे आमचे दैवत आहेत. भावनांशी खेळ कुठेही नको. म्हणून स्पष्टपणे दोन-तीन प्रश्न विचारतो” असं आदित्य ठाकरे यांनी म्हटलय. जेम्स ग्रॅण्ड डफ कोण आहेत?

“व्हिक्टोरिया अलबर्ट संग्रहालयाच्या वेबसाइटवर सांगितलय की, ही वाघनखं जेम्स ग्रॅण्ड डफ हे इतिहासाकार होते, त्यांच्या कलेक्शनमधली आहेत. जेम्स ग्रॅण्ड डफ यांचा दावा आहे की, ती वाघनखं महाराजांनीच वापरली. पण व्हिक्टोरिया अलबर्ट म्युझिमच्या वेबसाइटवर म्हटलय की, महाराजांनीच ही वाघनखं वापरली हे सांगू शकत नाही. भावनांचा खेळ कुठही नको, स्पष्टीकरण हवय” असं आदित्य ठाकरे म्हणाले. .