घरात लग्नाची धावपळ, नियतीला मात्र काही दुसरंच मान्य, नवरदेवाचाच हृदयद्रावक मृत्यू

सुखाचं वातवरण कधी दुःखात बदलेल काहीही सांगता येत नाही. दहा दिवसांनंतर घरात लग्न होतं. पण लग्नाला फक्त 10 दिवस राहिलेले असताना नवरदेवाचं निधन झालं आहे. घरात लग्नाची धावपळ सुरु असताना, जळगाव मधील दहिगाव येथील 27 वर्षीय तरुणावर काळाने घाला घातल्याने संपूर्ण परिसरात हळहळ व्यक्त होत आहे. 4 जून रोजी बोहल्यावर चढणाऱ्या या तरुणाचा, ऐन लग्नाच्या तयारीत असताना रोटावेटरच्या अपघातात झालेला मृत्यू अतिशय वेदनादायक आहे. लग्नाआधीच तरुणाला मृत्यूने कवटाळलं असल्यानं गावात हळहळ व्यक्त केली जात आहे.

मिळालेल्या माहिती नुसार दहिगाव येथील योगेश यशवंत पाटील, शोभराज रमेश महाजन यांच्या मोहराळे शेतात ट्रॅक्टरने रोटावेटर करण्यासाठी केला होता. रोटावेटर करीत असताना त्याचा अचानक तोल जाऊन तो ट्रॅक्टरच्या मोठ्या चाकाखाली सापडून अडकून जागीच ठार झाला. तरी देखील ट्रॅक्टर सुरुच होता. संपूर्ण घटना एका तरुणाने पाहिली आणि त्याने तात्काळ ट्रॅक्टर बंद केला.

तरुणाने तत्काळ योगेश याच्या वडिलांना संपर्क केला त्याचे वडील व नातेवाईक त्वरित तिथे दाखल झाले. त्यानंतर योगेश याला कुटुंबियांनी यावल येथील ग्रामीण रुग्णालयात दाखल केलं. पण तोपर्यंत उशीर झालेला होता. यावल ग्रामीण रुग्णालयात वैद्यकीय अधिकाऱ्यांनी शवविच्छेदन केलं. अखेर योगेश याची अकस्मित मृत्यूची नोंद करण्यात आली आहे.

योगेश यांचं लग्नाच्या 10 दिवस आधी निधन

योगेश याचं लग्न अवघ्या 10 दिवसांवर होतं. पण सुखी संसाराची स्वप्न पाहणाऱ्या योगेश याच्या निधनाने कुटुंबियांवर दुःखाचा डोंगर कोसळला आहे. ज्या घरातून योगेश याच्या लग्नाची वरात निघणार होती आज त्याच घरातून योगेश याची अंत्ययात्रा निघाली. घरात सर्वत्र लग्नाची तयारी सुरु होती. पण कधी काय होईल कोणीही सांगू शकत नाही आणि नशिबापुढे कुणाचं काहीही चालत नाही. हे पुन्हा एकदा समोर आलं आहे. फार कमी वयात योगेश याने अखेरचा श्वास घेतल्याने परिसरात दुःखाचं वातावरण आहे.