डॉक्टरांचा भोंगळ कारभार; सरकारी रुग्णालयात सुरु तरी काय? प्रसुतीसाठी आलेल्या एका महिलाचा मृत्यू, दुसरी तर… मनसे ॲक्शन मोडवर

नवी मुंबई महानगरपालिकेच्या रुग्णालयात चुकीच्या उपचारामुळे एका महिलेचा मृत्यू तर दुसरी महिला व्हेंटिलेटरवर असल्याची धक्कादायक माहिती समोर येत आहे. यामुळे आता  डॉक्टरांचा भोंगळ कारभार  पुन्हा समोर आला आहे. ज्या डॉक्टरांच्या हातात रुग्णांचं संपूर्ण आयुष्य असतं, त्यांच्यावर आता निशाणा साधला जात आहे. गरोदर महिलेच्या मृत्यूनंतर कुटुंबिय देखील संतपले असून खळबळ उडाली आहे. ज्या महिलेचा मृत्यू झाला आहे, तिच्या बाळाचा  देखील पोटातच मृत्यू झाल्याची धक्कादायक माहिती समोर येत आहे.

ऐरोलीतील रुग्णालयात प्रसूतीसाठी दोन महिला दाखल झाल्या होत्या. पण दोन महिलांपैकी एकीचा मृत्यू झाला आहे, तर दुसऱ्या महिलेची प्रकृती गंभीर असून तिच्यावर उपचार सुरु आहेत. ज्या महिलेचा प्रसुतीदरम्यान मृत्यू झाला आहे तिचं नाव सोनम डोंगरे असं होतं, तर तिच्या बाळाचा देखील पोटातच मृत्यू झाला आहे. उपचारावेळी चुकीचा डोस दिल्याने महिलेचा मृत्यू झाल्याचा आरोप नातेवाईकांनी केला आहे.

घडलेल्या घटनेनंतर मनसे पक्षातील कार्यकर्ते ॲक्शन मोडवर आले असून, राजमाता जिजाऊ रुग्णालय येथे जाब विचारण्यासाठी आले आहेत. ऐरोली राजमाता जिजाऊ रुग्णालय वैद्यकीय अधीक्षक डॉ माधवी इंगळे यांना जाब देखील विचारला. घडलेल्या घटनेनंतर जबाबदार व्यक्तींवर कारवाई करण्याची देखील माहणी होत आहे. यावर महापैर सुजाता पाटील यांनी देखील संताप व्यक्त केला आहे.

घडलेल्या घटनेनंतर महापौर सुजाता पाटील यांनी घटनेची चौकशी करण्याचे आदेश दिले आहेत. एवढंच नाही तर, घटनेच्या चौकशीसाठी तात्काल समिती नेमण्याचा निर्णय देखील घेण्यात आला आहे. शिवाय येत्या 15 दिवसांत समितीचा अहवाल सादर केला जाणार आहे… असं देखील महापौर म्हणाल्या.

घडलेल्या घटनेवर वैद्यकीय अधिकारी डॉ. राजेश म्हात्रे यांनी देखील प्रतिक्रिया दिली आहे. ‘नवी मुंबई महापालिकेच्या रुग्णालयात, गर्भवती महिलांना योग्य ते इंजेक्शन आणि औषधं दिली जातात. दरम्यान, एका महिलेचा मृत्यू झाला असून दुसऱ्या महिलेवर उपचार सुरु आहेत. पण मृत्यूचं कारण नेमकं काय असू शकतं? याची चौकशी करण्यासाठी एक समिती नेमण्यात आली आहे…’ त्यामुळे आता याप्रकरणी पुढे काय होणार पाहणं महत्त्वाचं ठरणार आहे.