गणपती दर्शनाला मायलेक गेले, परतताना गुगल मॅपने दिशाभूल केली, महिलेचा मृत्यू

गुगल मॅपच्या चुकीच्या मार्गदर्शनामुळे एका महिलेच्या दुचाकी वाहनाला अपघात होऊन तिचा दुर्दैवी मृत्यू झाल्याची घटना बदलापूर जेएनपीटी मार्गावर घडली आहे. ही महिला टिटवाळा येथे गणपती दर्शनाला गेली होती. तेथून कल्याणला परतत असताना जांभळे गावाजवळील नवीन पुलावर त्यांची दुचाकी खड्ड्यात आदळली. त्यात जखमी झाल्याने महिलेचा मृत्यू झाला आहे.

अरुणा अरुण कुलकर्णी ( वय ५० ) असे अपघातात मृत्यू झालेल्या महिलेचे नाव आहे. कल्याण एकविरा नगरातील रामदास सोसायटीत राहणाऱ्या अरुणा कुलकर्णी त्यांचा मुलगा प्रतीक कुलकर्णी दुचाकीवरुन २८ जून रोजी टिटवाळ्याच्या गणपतीचे दर्शन घेण्यासाठी गेल्या होत्या. गणपती दर्शन झाल्यानंतर रात्री साडे आठच्या सुमारास ते परतत असताना त्यांनी गुगलला जवळचा मार्ग विचारला असता या पुलाचे लोकेशन दाखवण्यात आले.

जांभळे गावाजवळील नदीवरील काम सुरु असलेल्या या पुलावर दुचाकीसमोर खड्डा न दिसल्याने त्याने दुचाकीचा अचानक ब्रेक दाबला, त्यामुळे दुचाकीचा तोल गेला आणि मागे बसलेली त्याची आई खाली डोक्यावर पडल्याने गंभीर जखमी झाली. अरुणा यांना तातडीने बदलापूरातील सरकारी रुग्णालयात नेण्यात आले. तेथे डॉक्टरांनी तपासून त्यांना मृत घोषीत केले.

गुगल मॅपने चुकीचा रस्ता दाखवला

या प्रकरणात गुगल मॅपने चुकीचा रस्ता दाखवल्याचे म्हटले जात आहे. या प्रकरणात बदलापूर पश्चिम पोलिस ठाण्यात या प्रकरणात अस्कमात मृत्यूची नोंद करण्यात आली आहे. जांभळे गावातून जाणारा हा मुंबई- बडोदे महामार्ग असून त्याचे काम अद्याप पूर्ण झालेले नाही. हा मार्ग अधिकृतपणे वाहतुकीसाठी खुला झालेला नाही. तरीही हा मार्ग तयार झाल्यासारखा दिसत असल्याने आणि अनेकदा ”जीपीएस” हा मार्ग दाखवतो.या मार्गावरुन वाहन घेतल्याने पुलाच्या जॉईंटवरील खड्ड्यात ही दुचाकी थडकल्याने हा अपघात घडल्याचे म्हटले जात आहे.