Ram Mandir : रामलल्लाच्या मूर्तीचा रंग का आहे काळा, जाणून घ्या कारण

Ram mandir : अयोध्येतील राम मंदिरात रामलल्लाची मूर्ती विराजमान झाली असून २२ जानेवारी रोजी पंतप्रधान नरेंद्र मोदी यांच्याहस्ते त्याची प्राणप्रतिष्ठा होणार आहे. या सोहळ्यासाठी जय्यत तयारी करण्यात आली असून अनेक सेलिब्रिटी उपस्थित राहणार आहेत. 22 जानेवारीला काही सेंकदाचा हा मुहूर्त असणार आहे. राम मंदिरात शुक्रवारीच रामलल्लाची मूर्ती विराजमान झाली. त्यानंतर मूर्तीचे फोटो सोशल मीडियावर व्हायरल झाले. मूर्तीचा फोटो समोर आल्यानंतर अनेकांनी प्रश्न उपस्थित केले की, मूर्तीचा रंग काळा का आहे.

राम मंदिरात विराजमान रामाची मूर्ती ही काळ्या दगडापासून बनवण्यात आली असून ती बालस्वरूपात आहे. रामललाची मूर्ती एकाच दगडापासून बनवण्यात आली आहे. या काळ्या दगडाला कृष्ण शिला असेही म्हणतात. त्यामुळे रामललाची मूर्तीही गडद काळ्या रंगाची आहे. ज्या दगडातून रामललाची मूर्ती बनवली गेली आहे त्यात अनेक गुण आहेत. तो दगड अनेक अर्थांनी विशेष आहे.

रामललाच्या मूर्तीत खास दगड का वापरले जातात?

रामललाच्या मूर्तीच्या बांधकामात हा दगड वापरण्यामागील एक कारण म्हणजे रामलल्लावर दुधाचा अभिषेक केला जातो तेव्हा दगडामुळे दुधाच्या गुणवत्तेत कोणताही बदल होणार नाही. त्या दुधाचे सेवन केल्याने आरोग्यावर कोणताही विपरीत परिणाम होत नाही. तसेच हजार वर्षांहून अधिक काळ मूर्ती तशीच राहू शकते. म्हणजे त्यात कोणताही बदल होणार नाही.

वाल्मिकी रामायणातही वर्णन

वाल्मिकी रामायणात भगवान रामाचे रूप काळ्या रंगात वर्णन केले आहे. त्यामुळे रामललाच्या मूर्तीचा रंग काळा असण्याचे हे देखील एक कारण आहे. तसेच रामललाची पूजा श्यामल रूपातच केली जाते.

श्रीरामाची मूर्ती कशी आहे?

श्री रामजन्मभूमी तीर्थ क्षेत्राचे सरचिटणीस चंपत राय यांनी सांगितले की, भगवान श्री रामलला यांची मूर्ती पाच वर्षांच्या मुलाच्या रूपात आहे. त्यांनी सांगितले की, मूर्ती 51 इंच उंच असून रामललाची मूर्ती काळ्या दगडाची आहे. रामलल्लाच्या मूर्तीवर अवतार देखील दाखवण्यात आले आहे.

राम मंदिराच्या उद्घाटनाच्या निमित्ताने संपूर्ण देशात उत्साहाचे वातावरण आहे. जगभरातील मंदिरांमध्ये रोषणाई केली जाणार आहे. अनेक ठिकाही कार्यक्रमांचे आयोजन करण्यात आले असून हा दिवस दिवाळीसारखा साजरा करण्याचं आवाहन पंतप्रधान मोदी यांनी केले आहे.