मोठी बातमी! चंद्रशेखर बावनकुळेंना लागली लॉटरी, भाजपकडून राष्ट्रीय पातळीवर मोठी जबाबदारी

भाजपच्या गोटातून मोठी बातमी समोर आली आहे. मंत्री चंद्रशेखर बावनकुळे यांच्यावर भाजपकडून संघटनात्मक नवी जबाबदारी देण्यात आली आहे. आगामी राजस्थान विधानसभा निवडणुकीच्या भाजप संघटनात्मक सहप्रभारी पदी बावनकुळे यांची नियुक्ती करण्यात आली आहे. राज्यात बावनकुळेंवर जरांगे पाटील टीकास्त्र सोडत असताना दुसऱ्या बाजूने भाजपकडून बावनकुळे यांना राष्ट्रीय जबाबदारी सोपवली आहे. याबाबत सविस्तर माहिती जाणून घेऊयात.

राजस्थानमधील स्थानिक स्वराज्य संस्थांच्या निवडणुकांच्या तयारीला सुरूवात

राजस्थानमधील आगामी स्थानिक स्वराज्य संस्थांच्या निवडणुकांच्या पार्श्वभूमीवर भारतीय जनता पक्षाने रणनीती आखण्यास सुरूवात केली आहे. पक्षाचे राष्ट्रीय अध्यक्ष नितीन नवीन यांनी राजस्थानमधील स्थानिक स्वराज्य संस्थांच्या निवडणुकांसाठी माजी खासदार हरीश द्विवेदी यांची प्रभारी म्हणून नियुक्ती केली आहे. त्यांच्यासोबत पाच नेत्यांवर सहप्रभारीपदाची जबाबदारी सोपवण्यात आली आहे.

या नेत्यांवर जबाबदारी

पक्षाकडून 14 ऑगस्ट रोजी जारी करण्यात आलेल्या आदेशानुसार, महाराष्ट्र सरकारमधील मंत्री चंद्रशेखर बावनकुळे, खासदार गजेंद्र सिंह पटेल, खासदार संगीता यादव, रोहन गुप्ता आणि दिल्ली सरकारमधील मंत्री रविंद्र इंद्राज सिंह यांची सहप्रभारी म्हणून नियुक्ती करण्यात आली आहे. या सर्व नियुक्त्या तत्काळ प्रभावाने लागू करण्यात आल्या आहेत.

पक्ष संघटनेवर भर

स्थानिक स्वराज्य संस्थांच्या निवडणुकांपूर्वी प्रभारी आणि सहप्रभारींच्या नियुक्तीला भाजपच्या निवडणूक रणनीतीतील महत्त्वाचे पाऊल मानले जात आहे. राजस्थानसाठी तयार करण्यात आलेल्या टीममध्ये विविध राज्यांतील आणि वेगवेगळ्या राजकीय अनुभव असलेल्या नेत्यांचा समावेश करण्यात आला आहे. यावरून भाजप स्थानिक स्वराज्य संस्थांच्या निवडणुकांकडे गंभीरतेने पाहत असल्याचे समोर आले आहे.

निवडणुकीच्या संभाव्य तारखा

राजस्थान निवडणूक आयोगाने न्यायालयात दिलेल्या माहितीनुसार, पंचायत निवडणुकांची घोषणा 23 सप्टेंबर रोजी होण्याची शक्यता आहे. त्यानुसार 13 ऑक्टोबर ते 5 नोव्हेंबरदरम्यान अनेक टप्प्यांत मतदान होण्याची शक्यता आहे. तर 12 नोव्हेंबरपर्यंत निवडणुकीचे निकाल जाहीर होण्याची शक्यता आहे. तर शहरी स्थानिक स्वराज्य संस्थांच्या निवडणुकांची घोषणा 17 ऑगस्ट रोजी होण्याची शक्यता आहे. शहरी भागात 6 आणि 9 सप्टेंबर रोजी मतदान, तर 11 सप्टेंबर रोजी मतमोजणी प्रस्तावित आहे. मात्र, निवडणूक आयोगाकडून निवडणुकीच्या तारखांमध्ये बदल होऊ शकतो, असे सांगण्यात आले आहे.