रात्री प्रेयसीला चोरुन भेटायला गेला, घरचे आले म्हणून लपण्याच्या प्रयत्नात जे घडलं त्याने सर्वच…

हैदराबाद / 8 ऑगस्ट 23023 : असं म्हणातात प्रेम आंधळं असतं. प्रेमात माणूस काय करेल याचा नेम नाही. कधी कधी आंधळ्या प्रेमात उचलले पाऊलही घातकही ठरते. अशीच एक घटना हैदराबादमध्ये उघडकीस आली आहे. मध्यरात्रीच्या सुमारास प्रियकर प्रेयसीच्या घरी तिला भेटायला गेला. मात्र इतक्यात तिच्या घरचे आल्याची चाहूल लागली, म्हणून तो लपण्याचा प्रयत्न करत होता. पण याच प्रयत्नात तो इमारतीच्या तिसऱ्या मजल्यावरुन पडला आणि यात गंभीर जखमी झाला. त्याला उपचारासाठी रुग्णालयात दाखल करण्यात आले, मात्र उपचारादरम्यान त्याचा मृत्यू झाला. मोहम्मद शोएब असे मयत तरुणाचे नाव आहे. याप्रकरणी तरुणाच्या वडिलांच्या फिर्यादीवरुन कलम 174 अन्वये गुन्हा दाखल करण्यात आला असून, पोलीस प्रकरणाचा तपास करत आहेत.

मध्यरात्री प्रेयसीला भेटायला गेला अन्…

मोहम्मद एका बेकरीत सेल्समनचे काम करत होता. तो रोज दुपारी 1 ते रात्री 1 पर्यंत कामाला जायचा. नेहमीप्रमाणे 6 ऑगस्ट रोजी तो कामावर गेला. त्यानंतर कामावरुन निघाल्यावर रात्री 2.45 च्या सुमारास तो प्रेयसीला भेटण्यासाठी तिच्या घरी गेला. दोघं जण बोलत असतानाच कुणीतरी आल्याची चाहूल त्यांना लागली. यामुळे मोहम्मद लपण्याचा प्रयत्न करत होता. या प्रयत्नात तो तिसऱ्या मजल्यावरुन खाली पडला. जखमी अवस्थेत त्याला रुग्णालयात नेण्यात आले. मात्र काही वेळातच त्याचा मृत्यू झाला.

उपचारादरम्यान मुलाचा मृत्यू

तरुणाच्या घरच्यांना याबाबत माहिती मिळाल्यानंतर त्यांनी तात्काळ घटनास्थळी धाव घेत मुलाला उस्मानिया रुग्णालयात नेले. मात्र त्याचा फायदा झाला नाही. गंभीर जखमी झाल्याने मुलाचा मृत्यू झाला. मुलाच्या वडिलांनी याबाबत चौकशी करुन योग्य कारवाई करण्याची मागणी पोलिसांकडे केली आहे. याप्रकरणी पोलीस तपास करत आहेत. तपासानंतरच हा अपघात आहे की घातपात याबाबत स्पष्ट होईल.