आधी पाया पडला, नंतर पाण्यात दाबून धरले… पित्यानेच चंबळ नदीत मुलीला… दिल्ली हादरली

राजधानी दिल्लीतून अंगावर काटा आणणारी बातमी समोर आली आहे. 18 वर्षीय अविवाहित मुलगी गर्भवती असल्याचे समजल्यानंतर सामाजिक बदनामीच्या भीतीने तिच्या वडिलांनी तिला आग्राजवळील चंबळ नदीत बुडवून ठार मारल्याचा धक्कादायक प्रकार समोर आला आहे. लखपत सिंह असे आरोपीचे नाव असून त्याला आणि त्याच्या एका नातेवाईकाला अटक करण्यात आली आहे. या घटनेतील तरुणीचा मृतदेह अद्याप सापडलेला नाही. पोलिसांनी या घटनेच्या तपासाला सुरूवात केली आहे.

समोर आलेल्या माहितीनुसार, दक्षिण दिल्लीत आई-वडिलांसोबत राहणारी ही 18 वर्षीय अविवाहित तरुणी सुमारे तीन महिन्यांची गर्भवती होती. लग्नाआधीच गर्भवती राहिल्याने सामाजिक बदनामीच्या भीतीने तिच्या वडिलांच्या तळपायाचा राग मस्तकात गेला. त्यांनी नातेवाईकासोबत तिच्या हत्येचा कट रचला. त्यानंतर मुलीला आग्र्यातील बसोनीजवळील चंबळ नदीच्या काठावर नेऊन जाणूनबुजून पाण्यात बुडवून ठार मारल्याचा आरोप आहे. या प्रकरणी दोन्ही आरोपींना अटक करण्यात आली असून पुढील तपास सुरू आहे.

उपचाराच्या बहाण्याने आग्र्याला नेले

चौकशीदरम्यान आरोपींनी पोलिसांना सांगितले की, 28 जुलै रोजी उपचारासाठी नेण्याच्या बहाण्याने त्यांनी तरुणीला आग्र्याला नेले. तेथे एका नातेवाईकाच्या घरी रात्र घालवल्यानंतर दुसऱ्या दिवशी तिला चंबळ नदीकाठी नेण्यात आले. यावेळी त्यांनी तरुणीला स्वतः नदीत उडी मारण्यास सांगितले. मात्र तिने नकार दिला. यानंतर वडिल तिच्या पाया पडले आणि तिला जबरदस्तीने पाण्यात नेऊन तिचे डोके पाण्याखाली दाबून ठेवले. ती बुडाल्यानंतर हात जोडून तिची माफीही मागितली, अशी माहिती तपासात समोर आली आहे.

शेजाऱ्याच्या संशयामुळे उघड झाला प्रकार

पोलिसांनी सांगितले की, 31 जुलै रोजी आरोपी दिल्लीत परतल्यानंतर त्याने शेजाऱ्यांना मुलगी नैराश्यात होती आणि उपचारासाठी आग्र्याला नेले होते, असे सांगितले. उपचारादरम्यान तिचा मृत्यू झाल्याने आग्र्यातच अंत्यसंस्कार केल्याचा दावा त्याने केला. मात्र, त्याच्या या विधानामुळे संशय आल्याने एका शेजाऱ्याने पोलिसांना माहिती दिली.

मोबाईल लोकेशन आणि फोटो महत्त्वाचे पुरावे

पोलिसांनी चौकशी सुरू केल्यानंतर आरोपीने सुरुवातीला दिशाभूल करण्याचा प्रयत्न केला, मात्र नंतर त्याने गुन्ह्याची कबुली दिली. तपासादरम्यान पोलिसांना आरोपींविरुद्ध तांत्रिक पुरावे मिळाले आहेत. एका मोबाईलमधून वडील आणि मुलगी नदीत एकत्र असल्याचे अनेक फोटो मिळाले आहेत. तसेच, पीडित तरुणी आणि दोन्ही आरोपींच्या मोबाईल लोकेशनवरून तिघेही आग्र्याला गेले असल्याची पुष्टी झाल्याचे पोलिसांनी सांगितले आहे.