दिल्ली हायकोर्टाने ईशा फाऊंडेशनविरोधातील याचिका फेटाळली, कथित बदनामीकारक मजकूर हटवण्याचे आदेश

नवी दिल्ली, 19 मार्च 2026: दिल्ली उच्च न्यायालयाने आज अंतरिम आदेश देत तमिळ मीडिया संस्था नक्कीरन यांना ईशा फाउंडेशन आणि त्याचे संस्थापक सदगुरु यांच्याविरोधात प्रकाशित करण्यात आलेले मानहानीकारक व्हिडिओ आणि लेख हटवण्याचे निर्देश दिले. या आदेशाचे स्वागत करत ईशा फाउंडेशनने म्हटले आहे की, खोटे आणि द्वेषपूर्ण आशय पसरवणाऱ्यांविरुद्ध ते कायदेशीर कारवाई सुरूच ठेवतील.

हे प्रकरण नक्कीरनने प्रसिद्ध केलेल्या व्हिडिओंच्या मालिकेमुळे सुरू झाले होते, ज्यामध्ये मानहानीकारक, अश्लील आणि आक्षेपार्ह सामग्री असल्याचा आरोप आहे. या व्हिडिओंच्या माध्यमातून ईशा फाउंडेशन आणि सदगुरु यांच्या प्रतिमेला हानी पोहोचवण्याचा प्रयत्न केल्याचे सांगितले जाते. त्यानंतर, फाउंडेशनने 2024 मध्ये दिल्ली उच्च न्यायालयात मानहानीचा दावा दाखल करून अशा सामग्रीला हटवण्याची आणि भविष्यात अशा प्रकारच्या सामग्रीच्या प्रकाशनावर बंदी घालण्याची मागणी केली.

ईशा फाउंडेशनने या प्रकरणात अंतरिम अर्ज दाखल करून, याचिकेत नमूद केलेली तसेच सुप्रीम कोर्ट मध्ये ट्रान्सफर याचिकेदरम्यान प्रकाशित झालेली सामग्री तात्काळ हटवण्याची मागणी केली होती. तसेच भविष्यात अशा प्रकारच्या सामग्रीच्या प्रकाशनावर प्रतिबंध घालण्याची मागणीही करण्यात आली होती. डिसेंबर 2025 मध्ये या अर्जावर सुनावणी झाली होती, त्यावेळी दोन्ही बाजूंचे युक्तिवाद ऐकून न्यायालयाने आदेश राखून ठेवला होता.

आज हा आदेश देण्यात आला असून न्यायालयाने नक्कीरनने ईशा फाउंडेशन आणि सदगुरु संदर्भात प्रकाशित केलेले आक्षेपार्ह व्हिडिओ आणि लेख हटवण्याचे निर्देश दिले आहेत. ईशा फाउंडेशनने आपल्या निवेदनात म्हटले, ‘आम्ही माननीय दिल्ली उच्च न्यायालयाच्या या अंतरिम आदेशाचे मनापासून स्वागत करतो. काही मीडिया संस्था आणि व्यक्ती कोणताही पुरावा नसताना खोटे आणि मानहानीकारक आरोप पसरवत आहेत, हे दुर्दैवी आहे. हा जनतेची दिशाभूल करण्याचा जाणीवपूर्वक प्रयत्न आहे.’

गेल्या तीन दशकांपासून ईशा फाउंडेशन मोठ्या प्रमाणावर सामाजिक विकास आणि मानव कल्याणासाठी कार्यरत आहे. या कामामुळे जगभरातील कोट्यवधी लोकांचे जीवन प्रभावित झाले आहे. याच कार्यात अडथळा आणण्यासाठी हे समन्वित हल्ले केले जात आहेत. जबाबदार असलेल्या व्यक्तींविरुद्ध आम्ही योग्य ती सर्व कायदेशीर कारवाई करत राहू. कोणतीही मानहानी किंवा दिशाभूल करणारी मोहीम आमच्या मानव कल्याणाच्या प्रयत्नांना थांबवू शकणार नाही.

मार्च 2025 मध्ये, दिल्ली उच्च न्यायालयाने यूट्यूबर श्याम मीरा सिंह यांना सदगुरु आणि ईशा फाउंडेशनविरोधात खोटे दावे असलेला मानहानीकारक व्हिडिओ हटवण्याचे निर्देश दिले होते. न्यायालयाच्या आदेशानंतर संबंधित भ्रामक व्हिडिओ हटवण्यात आला होता.