गगनचुंबी इमारतीत एसीचा ब्लास्ट, भयंकर आग लागताच आरडाओरडा आणि किंचाळ्या; मदतीसाठी लोक धावले सैरावैरा

उत्तर प्रदेशातील नोएडामधील एका सोसायटीत एसीचा स्फोट होऊन भीषण आग लागल्याची घटना घडली आहे. नोएडाच्या सेक्टर-119 मधील ‘द अरण्य सोसायटी’मधील एका फ्लॅटमधील एसीचा स्फोट झाल्याचे समोर आलं आहे. 21 मजली इमारतीमधील एका फ्लॅटला आग लागल्यानंतर एकच खळबळ उडाली. आग लागल्यानंतर लोकांची आरडाओरड आणि किंचाळ्या ऐकायला मिळाल्या. लोकांची आरडाओरड ऐकून इमारतीखाली उभे असलेल्या लोकांनी मदतीसाठी धावाधाव केली.

इमारतीच्या एका फ्लॅटला आग लागल्यानंतर सर्वत्र धुराचे लोट पसरू लागल्याने रहिवाशांमध्ये भीतीचं वातावरण पसरलं. आग लागल्याची माहिती मिळताच अग्निशमन दलाचे जवान घटनास्थळी पोहोचले. अग्निशमन दलाच्या जवानांनी तातडीने आगीवर नियंत्रण मिळवण्याचे काम सुरू केलं.

प्राथमिक माहितीनुसार, एसीचा (AC) स्फोट होऊन आग लागल्याचे सांगण्यात येत आहे. या आगीच्या घटनेने नागरिकांमध्ये दहशतीचे वातावरण पसरलं. या घटनेची माहिती मिळाल्यानंतर अग्निशमन दलाचे जवानांनी आगीवर पाण्याचा फवारा मारण्यास सुरुवात केली. या घटनेत कोणत्याही प्रकारची जिवीतहानी झालेली नाही. नोएडा पोलिसांनी दिलेल्या माहितीनुसार, 21 मजली अरण्य सोसायटीतील एका फ्लॅटला सोमवारी सकाळी आग लागल्याची घटना घडली. सूचना मिळताच सहा गाड्या घटनास्थळी पोहोचल्या. या घटनेनंतर मुख्य अग्निशमन दलाचे अधिकारी आणि गौतम बुद्ध नगरमधील स्थानिक पोलीस देखील घटनास्थळी पोहोचले. तसेच या प्लॅटमध्ये कोणताही व्यक्ती अडकलेला नाही, तसेच कोणत्याही प्रकारची जिवीतहानी झाली नसल्याचीही माहिती पोलिसांनी दिली.

https://x.com/ANINewsUP/status/2071468617179537912

अग्निशमन दलाचे अधिकारी म्हणाले, ‘आग एसीचा स्फोट किंवा शॉर्ट सर्किटमुळे झाल्याची शक्यता आहे. परंतु तपास केल्यानंतर आगीचं खरं कारण समोर येईल. आगीमुळे फ्लॅटचं किती नुकसान झालं, याचीही पाहणी केली जात आहे. मुख्य अग्निशमन अधिकारी प्रदीप चौबे यांनी सांगितलं की, ‘नोएडाच्या 119 येथील अरण्या सोसायटीच्या एका फ्लॅटमध्ये आग(Fire)  लागल्याची माहिती मिळाली. या घटनेची माहिती मिळाल्यानंतर पथकाला तातडीने घटनास्थळी पाठवलं. सध्या आगीवर नियंत्रण मिळवण्यात आलं आहे. या घटनेत जिवितहानी झालेली नाही. तपासानंतर आगीचं कारण समोर येईल’.