रस्ते अपघातात बरगड्या मोडल्या… तरीही विद्यार्थीनीने दिली नीट परीक्षा, शिक्षणमंत्री धर्मेंद्र प्रधान यांनी केली विचारपूस

कोलकाता, 21 जून : प्रतिकूल परिस्थितीतही आपल्या स्वप्नांचा पाठपुरावा करण्याच्या जिद्दीचे आणि संस्थात्मक सहकार्याचे प्रेरणादायी उदाहरण समोर आले आहे. रस्ते अपघातात गंभीर जखमी झालेल्या एका NEET-UG परीक्षार्थिनीने विशेष वैद्यकीय सुविधांच्या मदतीने रविवारी परीक्षा दिली. श्रिष्टी दुबे असे या विद्यार्थिनीचे नाव असून परीक्षेच्या अवघ्या एका आठवड्यापूर्वी ती गंभीर रस्ते अपघाताची शिकार झाली होती. तिच्या 9 बरगड्या मोडल्या होत्या. मोठी शस्त्रक्रिया आणि उपचार सुरू असतानाही तिने देशातील सर्वात मोठ्या वैद्यकीय प्रवेश परीक्षेत सहभागी होण्याचा निर्धार कायम ठेवला. यानंतर आता शिक्षणमंत्री धर्मेंद्र प्रधान यांनी तिची विचारपूस केला आहे.

पालकांनी केली होती विनंती

श्रिष्टी दुबे हिच्या पालकांनी तिला परीक्षेत विशेष सुविधा मिळणेबाबत अर्ज केला होता. त्यानी अर्जात म्हटले होते की, 14 जून रोजी तिचा गंभीर रस्ते अपघात झाला. या अपघातात तिच्या 9 बरगड्या तुटल्या असून फुफ्फुसांना गंभीर दुखापत झाली आहे. तिच्यावर मोठी रक्तवाहिन्यांची शस्त्रक्रिया करण्यात आली होती आणि काही काळ ती व्हेंटिलेटरवर होती. सध्या तिला व्हेंटिलेटरवरून काढण्यात आले असून ती हळूहळू बरी होत आहे. तिला परीक्षेत ILS हॉस्पिटल आवश्यक वैद्यकीय मदत, डॉक्टर, पॅरामेडिकल कर्मचारी आणि इतर आवश्यक व्यवस्था उपलब्ध करून देण्यास तयार आहे. तिला परीक्षा देण्यासाठी काही सुविधा द्याव्यात.

श्रिष्टीसाठी खास सुविधा

श्रिष्टी दुबे हिच्या कुटुंबाच्या विनंतीनुसार परीक्षा केंद्रात विशेष व्यवस्था करण्यात आली होती. तिच्यासाठी स्वतंत्र खोली उपलब्ध करून देण्यात आली होती, जिथे आवश्यक वैद्यकीय सुविधांची व्यवस्था करण्यात आली होती. तसेच कोणत्याही आपत्कालीन परिस्थितीचा सामना करण्यासाठी रुग्णवाहिका आणि वैद्यकीय पथक सज्ज ठेवण्यात आले होते.

धर्मेंद्र प्रधान यांनी साधला पालकांशी संवाद

केंद्रीय शिक्षणमंत्री धर्मेंद्र प्रधान यांनी स्वतः श्रिष्टीच्या पालकांशी दूरध्वनीवरून संवाद साधून तिच्या प्रकृतीची विचारपूस केली. परीक्षेत सहभागी होण्यासाठी आवश्यक असलेली सर्वतोपरी मदत उपलब्ध करून दिली जाईल, असे आश्वासन त्यांनी कुटुंबाला दिले. राष्ट्रीय परीक्षा संस्था (NTA), स्थानिक प्रशासन आणि परीक्षा केंद्र प्रशासनाने कुटुंबीय तसेच डॉक्टरांशी समन्वय साधून सर्व आवश्यक व्यवस्था सुनिश्चित केल्या. परीक्षा सुरू असताना डॉक्टर आणि पॅरामेडिकल कर्मचाऱ्यांची मदतही उपलब्ध होती.

श्रिष्टीच्या पालकांनी केंद्रीय शिक्षणमंत्री, NTA आणि परीक्षा अधिकाऱ्यांचे या संवेदनशील आणि तत्पर सहकार्यासाठी आभार मानले. त्यांच्या मते, या मदतीमुळे त्यांच्या मुलीला प्रतिकूल परिस्थिती असूनही आपल्या स्वप्नांच्या दिशेने एक महत्त्वाचे पाऊल टाकण्याची संधी मिळाली.