बसची हवा काढली, जंतरमंतरवर पोहोचण्याआधीच राहुल गांधी, प्रियंका गांधी पोलिसांच्या ताब्यात, दिल्लीत संग्राम

राहुल गांधींना पोलिसांनी उचललं, तर महिला पोलिसांनी प्रियांका गांधी यांनाही ताब्यात घेतलं आहे. प्रियांका गांधी या रस्त्यावर झोपल्या होत्या. यावेळी वातावरण तापलेलं पाहायला मिळत आहे. खासदारांसोबत अशी वर्तणूक होत आहे. खासदारांना पोलिस मारतात, हे सर्व काय सुरु आहे. आम्हाला फक्त जंतरमंतरवर आंदोलन करायचं होतं. पण तेही का करु देत नाहीत, असं प्रियांका गांधी यांनी म्हटलं आहे. दरम्यान, आता राहुल आणि प्रियांका गांधी दोघेही पोलिसांच्या ताब्यात आहेत. त्यांना अक्षरः उचलून पोलिसांच्या गाडीत नेण्यात आलं.

गेल्या तीन तासांपासून दिल्लीमध्ये हे आंदोलन सुरु आहे. जंतरमंतरकडे निघालेल्या इंडिया आघाडीच्या बसच्या हवा काढण्यात आली. पोलिसांनी हे कृत्य केल्यानंतर राहुल गांधी आणि प्रियंका गांधी यांच्यासह खासदारांचा संताप पाहायला मिळाला. त्यानंतर रस्त्यावरच ठिय्या देण्याचा निर्णय घेण्यात आला. सर्व खासदार आणि इंडिया आघाडीचे नेते रस्त्यावर बसले पण पोलिसांनी त्यांना सातत्याने अडवलं. यावेळी पोलिसांनी धरपकड करत राहुल गांधींना पोलिसांनी उचलून नेलं. त्याचवेळी प्रियंका गांधी यांनाही महिला पोलिसांनी उचललं. मोदी, शाह आणि ज्ञानेश कुमारांनी लोकशाही हायजॅक केली असल्याचा गंभीर आरोप राहुल गांधी यांनी केला होता.

दरम्यान, आता पोलिसांच्या गाडीतून राहुल गांधी आणि प्रियंका यांनी हातात संविधान घेतलं आणि ते सर्वांना उंचावून दाखवलं. पण यावेळी मोठा गोंधळ झालेला पाहायला मिळाला. बसची हवा काढल्यानंतर प्रियंका खाली उतरल्या तेव्हा अत्यंत संतप्त झाल्या होत्या. त्यांनी बाहेर पडल्यावर प्रचंड मोठा नेत्यांचा रेटा पाहायला मिळाला. प्रियांकांनी ठिय्या दिला तेव्हा त्यांनी सांगितलं की देशाच्या खासदारांसोबत अशा स्वरुपाची वागणून योग्य नाही.

एसआयआर रद्द करा, ज्ञानेश कुमार यांचा राजीनामा घ्या, अशा प्रकारच्या मागण्या करण्यासाठी हे आंदोलन करण्यासाठी इंडिया आघाडीचे नेते सरसावले आहेत. पण दिल्ली पोलिसांनी त्यांना जंतरमंतरवर जाण्याआधीच रोखलं आहे. पोलिस आता ताब्यात घेतलेल्या खासदारांना कुठे घेऊन जाणार याकडे लक्ष लागलं आहे.