Presidential Election 2022 : राष्ट्रपती हवे असतील शरद पवार आहेत, रबर स्टॅम्प हवा असेल तर अनेक रांगेत; राऊतांचा टोला

मुंबई: राष्ट्रवादीचे सर्वेसर्वा शरद पवार (Sharad Pawar) देशाचे मोठे नेते आहेत. देशातील सर्वात अनुभवी नेते आहेत. या प्रकारच्या निवडणुका येतात तेव्हा आम्ही सर्वजण पवारांचं मार्गदर्शन घेत असतो. देशाला आदर्श राष्ट्रपती हवा असेल, एक उत्तम प्रशासक हवा असले तर सरकारने राष्ट्रपती निवडावा (Presidential Election). रबर स्टॅम्प निवडू नये. पवार हे अनुभवी आहेत. प्रमुख नेते आहेत. संसदीय राजकारणातील अजिंक्य नेते आहे. पवारांच्या नावावर सर्वसंमती होऊ शकते. सरकारचं मन मोठं असेल तर ते राष्ट्रपती निवडतील नाही तर खुजे लोकं निवडतील, असं मी म्हणतोय. अशा गोष्टींसाठी राजकारण्याचं मन मोठं असायला हवं. देशाला राष्ट्रपती हवे असतील तर पवार आहेत. रबर स्टॅम्प हवा असेल तर अनेक लोक रांगेत आहेत, असा टोला शिवसेना नेते संजय राऊत (sanjay raut) यांनी लगावला. संजय राऊत यांनी अयोध्येत पत्रकार परिषद घेतली. यावेळी ते बोलत होते.

उद्या दिल्लीत एक बैठक होत आहे. ममता बॅनर्जी यांनी बोलावली आहे. सर्वांना बोलावलं आहे. पवार ही येणार आहेत. आम्हालाही निमंत्रण आहे. या बैठकीला आमचा प्रमुख नेता जाणार आहे. या बैठकीत राष्ट्रपतीपदाची रणनीती ठरणार आहे. पवार राष्ट्रपतीपदाचे उमेदवार असावेत असं आम्हाला वाटतं. पण पवारांनी या गोष्टींना मान्यता दिली पाहिजे. तरच पावलं पुढे पडू शकतात, असं ते म्हणाले.

ते मोदीही मान्य करतील

शरद पवारांनी विरोधी पक्षांचं नेतृत्व स्वीकारावं असं तुम्ही म्हणाला होता. आता पवारांनी राष्ट्रपतीपदाचे उमेदवार असावं असं म्हणत आहात. यापैकी पवार कोणत्या पदासाठी योग्य वाटतात, असं राऊत यांना विचारण्यातालं. त्यावर, दोन्ही पदासाठी पवारांची गरज जास्त आहे. जेव्हा विरोधकांच्या ऐक्याचा प्रश्न होता त्यावेळी कोणी तरी अनुभवी नेत्यांनी धुरा सांभाळावी असं मी म्हणत होतो. पण आता राष्ट्रपतीपदाची निवडणूक आहे. म्हणून आम्हाला पवार राष्ट्रपती व्हावेत असं वाटतं. प्रणव मुखर्जी आणि अब्दुल कलाम यांच्याप्रमाणे राष्ट्रपती हवे असतील तर एकच नाव पुढे येतं ते म्हणजे शरद पवार. हे मोदीही मान्य करतील, असंही ते म्हणाले.

पवारांची इच्छा दिसली नाही

मी शरद पवारांना भेटलो होतो. त्यांच्याशी राष्ट्रपती निवडणुकीविषयी चर्चा केली. त्यावेळी माझं याविषयावर पवारांशी बोलणं झालं. त्यावेळी पवारांची इच्छा दिसली नाही. राष्ट्रपतीपदासाठी आपण इच्छुक आहात का? असं मी त्यांना विचारलं. पण मला त्यांची इच्छा दिसली नाही. आता या विषयावर उद्या चर्चा होईल, असं राऊत म्हणाले.

मोदींच्या निर्णयाचं स्वागत, पण

पंतप्रधान नरेंद्र मोदी यांनी दहा लाख नोकऱ्या देण्याची घोषणा केली आहे. त्याचं राऊत यांनी स्वागत केलं. मोदींच्या ट्विटचं स्वागत करत आहे. मोदींनी दोन कोटी नोकऱ्या देण्याचं आश्वासन दिलं होतं. भाजपने हा आकडा पाच कोटी केला होता. पण आता मोदींनी स्वत: 10 लाख नोकऱ्या देणार असल्याचं सांगितलं. त्यांनी 10 लाखावर कायम राहावं. त्याला विरोध करण्याची गरज नाही. कारण हा देशाचा विषय आहे. नोकरीचा विषय आहे. त्याचं स्वागत केलं पाहिजे, असंही त्यांनी सांगितलं.