भारताचं टेन्शन वाढलं? डोनाल्ड ट्रम्प यांचं पाकिस्तानबाबत मोठं वक्तव्य, नवी भूमिका काय?

अमेरिकेचे राष्ट्रपती डोनाल्ड ट्रम्प वारंवार युटर्न घेताना दिसत आहेत, भारत आणि पाकिस्तानमध्ये आपण मध्यस्थी केल्याचा दावा त्यांनी केला होता. त्यानंतर त्यांनी युटर्न घेतला. मी मध्यस्थी नाही तर मदत केल्याचं त्यांनी म्हटलं. दरम्यान आता पुन्हा एकदा ट्रम्प यांनी आपली भूमिका बदलल्याचं पाहायला मिळत आहे, डोनाल्ड ट्रम्प यांनी पाकिस्तानचं तोंडभरून कौतुक केलं आहे. पाकिस्तानचे लोक बुद्धिमान आहेत, ते खूप चांगल्या वस्तू तयार करतात असं ट्रम्प यांनी म्हटलं आहे. पाकिस्तानच्या निर्यातीवर 29 टक्के टॅक्स लागण्याची शक्यता आहे, या पार्श्वभूमीवर ट्रम्प यांनी पाकिस्ताननचं कौतुक केलं आहे.

मात्र दुसरीकडे ट्रम्प यांनी पुन्हा एकदा भारताच्या व्यापारी धोरणावरून नाराजी व्यक्त केली आहे. भारत हा जगातील सर्वाधिक कर आकारणारा देश असल्याचं त्यांनी म्हटलं आहे. दुसरीकडे त्यांनी भारतासदंर्भात बोलताना मोठा गौप्यस्फोट देखील केला आहे. भारतानं अमेरिकन वस्तूंवरील सर्व कर रद्द करण्याची ऑफर दिली आहे, असा दावा ट्रम्प यांनी केला आहे. पाकिस्तानला अमेरिकेसोबत व्यापार करण्याची इच्छा आहे. पाकिस्तान अमेरिकेला 5 अब्ज डॉलरपेक्षाही जास्त वस्तुंची निर्यात करतो तर अमेरिकेडून केवळ 2.1 अब्ज डॉलरची आयात करतो असं ट्रम्प यांनी म्हटलं आहे.

पहलगाममध्ये मोठा दहशतवादी हल्ला झाला होता, या दहशतवादी हल्ल्यामध्ये 26 जणांचा मृत्यू झाला, त्यानंतर भारतानं पाकिस्तानविरोधात कडक भूमिका घेतली, भारतानं पाकिस्तानवर केलेल्या एअर स्ट्राईकमध्ये पाक व्याप्त काश्मीर आणि पाकिस्तानमधील 9 दहशतवाद्यांचे अड्डे उद्ध्वस्त करण्यात आले, यामध्ये 100 पेक्षा अधिक दहशतवादी ठार झाले, त्यानंतर पाकिस्तानने देखील भारतावर हल्ला करण्याचा प्रयत्न केला. त्यामुळे भारत आणि पाकिस्तानमध्ये तणाव चांगलाच वाढला होता, अखेर डोनाल्ड ट्रम्प यांच्या मध्यस्थीमुळे भारत आणि पाकिस्तानने युद्धविरामाची घोषणा केली. तेव्हा देखील ट्रम्प यांनी व्यापाराबाबत असाच एक दावा केला होता, मात्र भारतानं हा दावा फेटाळून लावला, युद्ध विरामामध्ये कुठेही व्यापाराचा संबंध नसल्याचं भारतानं आधीच स्पष्ट केलं आहे.