टीझर लीकनंतर 4 दिवसांनी श्रद्धाने शेअर केले ‘Eatha’चे नवे पोस्टर्स, कसा आहे टीझर?

Bollywood Actress : बॉलिवूड अभिनेत्री श्रद्धा कपूर हिने तिच्या आगामी ‘ईथा’ या चित्रपटाचे पहिले पोस्टर्स सोशल मीडियावर शेअर करताच चाहत्यांमध्ये उत्सुकतेची लाट उसळली आहे. पोस्टर्ससोबत श्रद्धाने तयार हो… येतेय! असे भन्नाट कॅप्शन दिले असून, त्यामुळे चित्रपटाबद्दलची चर्चा आणखी रंगली आहे. पोस्टर प्रसिद्ध होताच काही तासांतच लाखो लाइक्स आणि हजारो कमेंट्सचा वर्षाव झाला. श्रद्धाचा याआधी कधीही न पाहिलेला लूक पाहून चाहते चित्रपटाच्या प्रदर्शनाची आतुरतेने वाट पाहत आहेत.

श्रद्धाने तिच्या अधिकृत इन्स्टाग्राम अकाउंटवर दोन आकर्षक पोस्टर्स शेअर केले आहेत. या पोस्टर्समध्ये ती महाराष्ट्राच्या लोककलेतील दिग्गज कलाकार विठाबाई नारायणगावकर यांच्या भूमिकेत दिसत आहे. तिच्या चेहऱ्यावरील भाव, पारंपरिक वेशभूषा आणि देहबोली पाहता ती अक्षरशः विठाबाईंची प्रतिकृतीच वाटत आहे. पोस्टर्ससोबतच तिने चित्रपटाचा टीझर लवकरच प्रदर्शित होणार असल्याची माहितीही चाहत्यांना दिली.

विशेष म्हणजे ‘ईथा’चा टीझर काही निवडक चित्रपटगृहांमध्ये शाहिद कपूर, क्रिती सेनॉन आणि रश्मिका मंदाना यांच्या ‘कॉकटेल 2’ चित्रपटासोबत दाखवण्यात आला होता. टीझर पाहिल्यानंतर प्रेक्षकांकडून चित्रपटाला सकारात्मक प्रतिसाद मिळत आहे.

टीझरने वेधलं सर्वांचं लक्ष

चित्रपटाची कथा महाराष्ट्रातील सुप्रसिद्ध लावणी आणि तमाशा कलाकार विठाबाई नारायणगावकर यांच्या आयुष्यावर आधारित आहे. त्यांच्या आयुष्यातील संघर्ष, जिद्द आणि कलेवरील निष्ठा यांचे प्रभावी चित्रण या चित्रपटात करण्यात आले आहे. टीझरमध्ये दाखवण्यात आलेल्या एका प्रसंगाने सर्वांचे लक्ष वेधून घेतले आहे. गर्भधारणेच्या शेवटच्या टप्प्यात असतानाही विठाबाई रंगमंचावर जोशात लावणी सादर करत असतात. मात्र कार्यक्रमादरम्यानच त्यांना प्रसूतीवेदना सुरू होतात.

अशा कठीण परिस्थितीतही त्या कार्यक्रम अर्धवट न सोडता धैर्याने बॅकस्टेज जातात आणि बाळाला जन्म देतात. त्यानंतर एका दगडाच्या साहाय्याने बाळाची नाळ कापून त्या पुन्हा रंगमंचावर परत येतात आणि आपली अपूर्ण राहिलेली कला सादर करतात. कलेप्रती असलेली त्यांची निष्ठा आणि समर्पण पाहून उपस्थित प्रेक्षक थक्क होतात. हा प्रसंग चित्रपटातील सर्वात प्रभावी दृश्यांपैकी एक मानला जात आहे.

View this post on Instagram

A post shared by anjali production (@anjalimehta_production)

‘ईथा’मधील भूमिका श्रद्धा कपूरच्या कारकिर्दीतील सर्वात आव्हानात्मक भूमिकांपैकी एक मानली जात आहे. आतापर्यंत प्रामुख्याने शहरी, ग्लॅमरस आणि रोमँटिक भूमिकांमध्ये दिसलेल्या श्रद्धाला या चित्रपटासाठी पूर्णपणे वेगळा आणि ग्रामीण बाज असलेला अवतार साकारावा लागला आहे. लावणीसाठी आवश्यक असलेले हावभाव, देहबोली, बोलण्याची शैली आणि रंगमंचावरील आत्मविश्वास आत्मसात करण्यासाठी तिने विशेष मेहनत घेतल्याचे पोस्टर्स आणि टीझरमधून स्पष्ट दिसते.