Nashik : खासदार सोडून गेले फरक पडत नाही; 10 हजार शिवसैनिक प्रमाणपत्र घेऊन ‘मातोश्री’वर जाणार, बडगुजर यांची माहिती
नाशिकमधून दहा हजार शिवसैनिक प्रतिज्ञापत्र घेऊन मातोश्रीवर जाणार असल्याची माहिती शिवसेना महानगरप्रमुख सुधाकर बडगुजर यांनी दिली आहे.
नाशिक : एकनाथ शिंदे (Eknath Shinde) हे बंडखोरी करत शिवसेनेतून (Shiv Sena) बाहेर पडल्यानंतर शिवसेनेत उभी फूट पडल्याचे चित्र आहे. सुरुवातीला शिंदे यांना शिवसेनेतील आमदाराच्या एका मोठ्या गटाने पाठिंबा दिला होता. मात्र शिंदे हे मुख्यमंत्री होताच शिवसेनेतून शिंदे गटात सामील होणाऱ्या पदाधिकाऱ्यांच्या संख्येत वाढच होताना दिसून येत आहे. शिवसेनेच्या खासदारांनी देखील एकनाथ शिंदे यांना पाठिंबा दिला आहे. मात्र अशाही परिस्थितीमध्ये नाशिकमधील (Nashik) शिवसैनिक हे उद्धव ठाकरे आणि शिवसेनेसोबत ठामपणे उभे असल्याचे पहायला मिळत आहेत. कालच नाशिकमधील शिवसेनेच्या सर्व नगरसेवकांनी मातोश्रीवर जाऊन उद्धव ठाकरे यांची भेट घेतली होती. तर आता आणखी दहा हजार शिवसैनिक प्रतिज्ञापत्र घेऊन मातोश्रीवर जाणार असल्याची माहिती शिवसेना महानगर प्रमुख सुधाकर बडगुजर यांनी ‘टीव्ही 9 मराठी’शी बोलताना दिली आहे.
शिवसेनेकडे अनेक तगडे उमेदवार
यावेळी बोलताना सुधाकर बडगुजर यांनी शिंदे गटात सामील झालेल्या आमदार आणि खासदारांवर जोरदार निशाणा साधला आहे. खासदार शिवसेनेला सोडून गेले तर काही फरक पडत नाही. नाशिकमधील सामान्य शिवसैनिक उद्धव ठाकरे यांच्यासोबत आहेत. कांदे यांच्या जागेवरून नांदगाव मतदारसंघात निवडणूक लढवण्यासाठी अनेक इच्छूक आणि तगडे उमेदवार शिवसेनेकडे आहेत. खासदारांनी आतापर्यंत भाजपचीच कामे केली अशी टीका यावेळी त्यांनी केली. तसेच जे-जे शिवसेनेला सोडून शिंदे गटात सहभागी झाले आहेत, त्यांच्या जागी निवडणूक लढवण्यास प्रत्येक मतदारसंघात तीन ते चार उच्छूक उमेदवार असल्याचे देखील बडगुजर यांनी म्हटलं आहे.
दहा हजार शिवसैनिक मातोश्रीवर जाणार
पुढे बोलताना बडगुजर म्हणाले की, कोणी कुठेही जाऊद्यात, नाशिकमधील शिवसेना कायम एकसंघ आहे. नाशिकमधील शिवसैनिक हे कायम उद्धव ठाकरे यांच्यासोबत असणार आहेत. नगरसेवकांच्या भेटीनंतर आता आणखी दह हजार शिवसैनिक एकनिष्ठतेचे प्रमाणपत्र घेऊन मातोश्रीवर जाणार असल्याचे त्यांनी म्हटले आहे. रविवारीच नाशिकमधील शिवसेनेच्या सर्व नगरसेवकांनी उद्धव ठाकरे यांची मातोश्रीवर जाऊन भेट घेतली. ही भेट आगामी महापालिका निवडणुकीच्या पार्श्वभूमीवर महत्त्वाची मानली जात आहे. या भेटीमध्ये महापालिका निवडणुकीबाबत महत्त्वाची चर्चा झाल्याची महीती समोर येत आहे.
