बेळगाव प्रशासनाला संजय राऊतांची धास्ती, स्टेज, साऊंड सिस्टिमची मोडतोड! राऊतांचा कडक शब्दात इशारा
दादागिरी खपवून घेतली जाणार नाही, अशा शब्दात संजय राऊथ यांनी बेळगाव प्रशासनाला एकप्रकारे इशाराच दिलाय.
बेळगाव : शिवसेना खासदार संजय राऊत यांच्या सभेची बेळगाव प्रशासनाने चांगलीच धास्ती घेतल्याचं पाहायला मिळतंय. कारण, बेळगाव प्रशासनाकडून स्टेज आणि साऊंड सिस्टिम काढण्यासाठी दादागिरी करण्यात येत आहे. बेळगाव लोकसभा पोटनिवडणुकीसाठी महाराष्ट्र एकीकरण समितीचे उमेदवार शुभम शेळके यांच्या प्रचारासाठी संजय राऊत बेळगावमध्ये दाखल झाले आहेत. बेळगावात राऊतांची प्रचारसभा होणार आहे. तत्पूर्वी बेळगाव प्रशासनाची दादागिरी पाहायला मिळत आहे. मात्र, ही दादागिरी खपवून घेतली जाणार नाही, अशा शब्दात संजय राऊथ यांनी बेळगाव प्रशासनाला एकप्रकारे इशाराच दिलाय. (Breakdown of stage and sound system before Sanjay Raut’s campaign)
संजय राऊतांकडून कर्नाटक सरकारचा निषेध
सभेची आणि साऊंड सिस्टिमची रितसर परवानगी घेतली असताना स्टेट, माईक तोडणं हे लोकशाहीचा, निवडणूक आचारसंहितेच्या कोणत्या कलमात बसतं? असा सवाल संजय राऊत यांनी कर्नाटक सरकारला विचारलाय. कलेक्टर किंवा अन्य ज्याने हे आदेश दिले आहेत, त्यांनी घटनेचा भंग केलाय. अनेक वर्षांपासून आमचा लढा सुरु आहे. मुख्यमंत्री उद्धव ठाकरेंच्या नेतृत्वात हा लढा सुरुच राहिल. ही दडपशाही, दादागिरी आहे, अशा शब्दात संजय राऊत यांनी कर्नाटक सरकारचा निषेध केलाय.
बेळगावात उतरलोय. कर्नाटक सरकारकडून दडपशाहीला सुरूवात. संयुक्त महाराष्ट्र चौकीतील सभेसाठी महाराष्ट्र एकीकरण समितीने बांधलेले व्यासपीठ तोडले..सभा होणारच!गोळ्या चालवल्या तरी हरकत नाही. ही अस्मितेची लढाई झालीय.
— Sanjay Raut (@rautsanjay61) April 14, 2021
उमेदवार शुभम शेळकेंना वाढता प्रतिसाद
महाराष्ट्र एकीकरण समितीचे उमेदवार शुभम शेळके यांच्या प्रचारासाठी संजय राऊत यांची तोफ बेळगावात धडाडणार आहे. संध्याकाळी साडे सात वाजता संयुक्त महाराष्ट्र चौक, खडे बाजार इथं ही सभा होणार आहे. महाराष्ट्र एकीकरण समितीचे उमेदवार शुभम शेळके हे युवकांचं आकर्षण ठरत आहेत. त्यांच्या सभांना मिळणारा प्रतिसाद पाहून बेळगावसह महाराष्ट्रातील नेत्यांनी सभा घेण्याची घोषणा केलीय. त्याचाच भाग म्हणून संजय राऊत यांची सभा आज बेळगावमध्ये होत आहे. या सभेला हातकणंगलेचे शिवसेना खासदारधैर्यशिल माने यांच्यासह शिवसेनेचे अनेक नेते उपस्थित राहणार आहेत.
बेळगाव लोकसभा पोटनिवडणुकीत महाराष्ट्र एकीकरण समीतीचे उमेदवार दर्शन शेळके यांनी जोरदार मुसंडी मारली आहे शिवसेचा त्यांना पाठिंबा आहे. मी स्वतः त्यांच्या प्रचारासाठी 14 तारखेला बेळगावला पोहोचत आहे.. जय महाराष्ट्र pic.twitter.com/OvuBrq3DK5
— Sanjay Raut (@rautsanjay61) April 12, 2021
सुरेश अंगडी यांच्या निधनानंतर पोटनिवडणूक
भाजप खासदार आणि रेल्वे राज्यमंत्री सुरेश अंगडी यांच्या निधनानंतर बेळगाव लोकसभा मतदारसंघात पोटनिवडणूक जाहीर करण्यात आली आहे. येत्या 17 एप्रिलला बेळगाव लोकसभा पोटनिवडणुकीसाठी मतदान होणार असून 2 मे रोजी निवडणुकीचा निकाल जाहीर होणार आहे.
बेळगाव पोटनिवडणुकीसाठी रिंगणात कोण?
भाजपकडून सुरेश अंगडी यांच्या पत्नी मंगला अंगडी, तर कॉंग्रेसतर्फे आमदार सतीश जारकीहोळी रिंगणात उतरले आहेत. शिवसेनेतर्फे के. पी. पाटील यांनी उमेदवारी अर्ज दाखल केला होता. मात्र मराठी मतांची विभागणी टाळण्यासाठी त्यांनी उमेदवारी मागे घेतली. त्यानंतर शिवसेनेने महाराष्ट्र एकीकरण समितीला पाठिंबा जाहीर केला. त्यामुळे बेळगाव पोटनिवडणुकीची लढत तिरंगी झाली आहे.
संबंधित बातम्या :
बेळगाव लोकसभा पोटनिवडणूक : महाराष्ट्र एकीकरण समितीच्या प्रचारासाठी संजय राऊत बेळगावला जाणार
Karnataka bypolls : कर्नाटकात 15 जागांसाठी पोटनिवडणूक, भाजपला 8 जागी विजय आवश्यक!
Breakdown of stage and sound system before Sanjay Raut’s campaign
