तामिळनाडूत पडद्यामागे मोठ्या हालचाली, एका पत्राने राजकारणात उलथापालथ; काँग्रेसच्या थेट निर्णयाने गणित बदललं!

Tamilnadu Government Formation : लातामिळनाडू विधानसभा निवडणुकीचा निकाल गल्यानंतर राजकीय घडामोडींना चांगलाच वेग आला आहे. येथे अभिनेता थलापती विजय यांचा टीव्हीके हा सर्वात मोठा पक्ष ठरला आहे. या पक्षाने एकूण 108 जागा जिंकल्या आहेत. परंतु येथे कोणत्याही एका पक्षाला तेथे बहुमताचा 118 हा जादुई आकडा गाठता आलेला नाही. त्यामुळे टीव्हीके हा पक्ष अन्य पक्षांकडून पाठिंबा मागण्याची दाट शक्यता व्यक्त केली जात होती. असे असतानाच आता राजकीय गोटातून मोठी माहिती समोर आली आहे. येथे काँग्रेसने थेट सत्तेत सहभागी होण्याचा निर्णय घेतला आहे. त्यामुळे आता काँग्रेस टीव्हीके पक्षाला पाठिंबा देणार आहे.

नेमकं काय घडतंय?

तामिळनाडूत डीएमके आणिक काँग्रेस यांची अगोदरपासूनच युती आहे. या दोन्ही पक्षांनी एकत्र येत निवडणूक लढवली होती. येथे काँग्रेसने एकूण पाच जागांवर विजय मिळवला आहे. निवडणूक झाल्यानंतर मात्र आता काँग्रेस टीव्हीके पक्षाला पाठिंबा देणार आहे. तसा निर्णय घेण्यात आला आहे. म्हणजेच तामिळनाडूत काँग्रेस सत्तेत सहभागी होणार आहे. विजय थलापती यांचा पक्ष सर्वात मोठा ठरल्यानंतर काँग्रेसचे खासदार राहुल गांधी यांनी लगेच त्यांना शुभेच्छा दिल्या होत्या. त्यानंतर काँग्रेस टीव्हीकेला पाठिंबा देऊ शकते, अशी शक्यता व्यक्त केली जात होती. आता हीच शक्यता खरी ठरली आहे.

काँग्रेसने ठेवली एक अट

काँग्रेसकडे पाच आमदार आहेत. काँग्रसने हा पाठिंबा देताना टीव्हीके पक्षापुढे एक अट समोर ठेवली आहे. आम्ही टीव्हीके पक्षाला पाठिंबा देऊ परंतु संविधानावर विश्वास नसलेल्या कोणत्याही जातीयवादी पक्षाला टीव्हीकेने भविष्यात या आघाडीत घेऊ नये, अशी काँग्रेसची अट आहे. विशेष म्हणजे काँग्रेस आणि टीव्हीकेची ही युती फक्त विधानसभेपुरतीच मर्यादित नसणार आहे. आगामी काळात होणारी लोकसभा निवडणूक, स्थानिक स्वराज्य संस्थाची निवडणूक असेल या सर्वच निवडणुकीत टीव्हीके आणि काँग्रेसची आघाडी असेल.

दरम्यान, याआधी तामिळनाडूत सत्तेत सहभागी व्हावे असे थलापती विजय यांनी राहुल गांधी यांना पत्र पाठवले होते. त्यानंतर काँग्रेसने पाठिंबा देण्याचा निर्णय घेतला आहे.