कुंकवाविना सुवासिनी तशी खडसेंविना विधानसभा, महाजनांच्या आठवणीने खडसे भावनिक

कुंकवाविना सुवासिनीची कल्पना करवत नाही, तशी खडसेंविना विधानसभेची कल्पना करता येत नाही' असं वक्तव्य भाजपचे दिवंगत नेते प्रमोद महाजन यांनी एका सभेत केलं होतं

कुंकवाविना सुवासिनी तशी खडसेंविना विधानसभा, महाजनांच्या आठवणीने खडसे भावनिक
अनिश बेंद्रे

|

Oct 17, 2019 | 11:03 AM

जळगाव : विधानसभेतून मला निलंबित केलं होतं, तेव्हा ‘कुंकवाविना सुवासिनीची कल्पना करवत नाही, तशी खडसेंविना विधानसभेची कल्पना करता येत नाही’ असं वक्तव्य भाजपचे दिवंगत नेते प्रमोद महाजन यांनी एका सभेत केलं होतं, अशी आठवण भाजपचे ज्येष्ठ नेते एकनाथ खडसे यांनी (Eknath Khadse Remembers Pramod Mahajan) जागवली.

ज्या वेळेस मला विधानसभेने निलंबित केलं होतं, त्यावेळेस एका सभेत प्रमोद महाजन म्हणाले होते, की ‘विधानसभेतला नाथाभाऊंचा आवाज संपूर्ण महाराष्ट्राला आवडतो. विधानसभेने एकनाथ खडसे यांना निलंबित केले म्हणजे ”कुंकवाविना सुवासिनीची कल्पना सहन करता येत नाही” तसेच नाथाभाऊविना विधानसभा ही कल्पना मला सहन होत नाही’ अशी आठवण एकनाथ खडसे यांनी सांगितली. जळगावातील भुसावळमध्ये प्रचारसभेदरम्यान भाजपशी एकनिष्ठ असल्याचं सांगताना खडसे भावनिक झाले.

पक्षाने तिकीट न दिल्याने एकनाथ खडसे यांनी आपल्या मनातील खंत व्यक्त करुन पक्षाला सूचक संदेश दिला आहे का, या चर्चांना उधाण (Eknath Khadse Remembers Pramod Mahajan) आलं आहे.

राष्ट्रवादीकडून पक्षप्रवेशाची ऑफर

राष्ट्रवादीवाले माझ्याकडे एबी फॉर्म घेऊन आले होते. शेवटच्या क्षणापर्यंत त्यांनी वाट पाहिली. अखेर राष्ट्रवादीला शिवसेनेकडून उसनवार घेतलेल्या उमेदवाराला पाठिंबा द्यावा लागला. त्या अपक्ष उमेदवाराला पाठिंबा दिला, पण त्याने अद्याप शिवसेना सोडली नाही, पहिल्या नवऱ्याला घटस्फोट दिलेला नाही, अशी टीकाही एकनाथ खडसे यांनी केली.

एका राष्ट्रीय पक्षाच्या अध्यक्षांना, जे पंतप्रधानपदावर दावा करतात, त्या शरद पवारांना मुक्ताईनगर मतदारसंघात एका अपक्ष उमेदवाराला पाठिंबा द्यावा लागला, एवढी दयनीय अवस्था शरद पवार यांची झाली असल्याचं एकनाथ खडसे म्हणाले.

माझ्यावर अन्याय झाला असून आजही मी पक्षाला तेच विचारतोय की मी काय गुन्हा केला आहे? ज्या पक्षाने मला मोठं केलं, मंत्रिपद दिलं, त्या मायेने एकाएकी मला सोडून दिलं. मात्र तरीही मी पक्षाशी एकनिष्ठ राहिलो, असे भावनिक उद्गार एकनाथ खडसे यांनी भुसावळमधील प्रचार सभेदरम्यान काढले.

राष्ट्रवादीकडून एबी फॉर्म देत पक्षप्रवेशाची ऑफर : एकनाथ खडसे

भुसावळ विधानसभा मतदारसंघातील महायुतीचे उमेदवार संजय सावकारे यांच्या प्रचारासाठी एकनाथ खडसे यांची जाहीर सभा आयोजित करण्यात आली होती. पाच वर्ष संजय सावकारे नाथाभाऊ यांच्या पाठीशी भक्कमपणे उभे राहिले. जवळचे आमदार मात्र पळून गेले. आता नाथाभाऊच्या मागे गेलो, तर आपलंही तिकीट कापलं जाईल अशी भीती त्यांना होती. मात्र तिकीटवाटप माझ्याकडे होतं. मी महाराष्ट्राच्या पार्लमेंटरी बोर्डात असून तिकीटवाटप मला विश्वासात घेऊनच झालं, असंही एकनाथ खडसे यांनी स्पष्ट केलं.

2014 मध्ये युती तोडण्याचा राग शिवसेनेने माझ्यावर काढला. मात्र हा पक्षाचा सामूहिक निर्णय होता. तो निर्णय जाहीर करायला कोणी पुढे येत नव्हते. मांजराच्या गळ्यात घंटा कोण बांधणार? ही धमक कोणात नव्हती म्हणून मी पुढे आलो, असं एकनाथ खडसे म्हणाले.

Non Stop LIVE Update

Follow us on

Related Stories

Most Read Stories

Click on your DTH Provider to Add TV9 MARATHI

राज्य चुनें