शपथविधीसाठी अजित पवारांचं नाव पुकारलं, आशिष शेलार म्हणाले, “या दादा या”

मुंबई : महाराष्ट्राच्या विधानसभेत आज नवनिर्वाचित आमदारांचा शपथविधी (Maharashtra MLA Oath Ceremony) होत आहे. हंगामी अध्यक्ष कालिदास कोळंबकर यांच्या उपस्थितीत आमदारांचा शपथविधी पार पडला. राष्ट्रवादी काँग्रेसच्या खासदार सुप्रिया सुळे यांनी सर्वपक्षीय आमदारांचं विधानभवनात ( Ashish Shelars comment on Ajit Pawar) स्वागत केलं. अत्यंत उत्साही वातावरणात सुप्रिया सुळेंनी आमदारांना हस्तांदोलन करत, गळाभेट घेत स्वागत केलं. (Ashish Shelars comment on Ajit Pawar)

सभागृतील ज्येष्ठ सदस्यांच्या शपथविधीने आमदारांचा शपथविधी सुरु झाला. सकाळी 8 वाजता भाजप आमदार बबनराव पाचपुते यांच्या शपथविधीने आमदारांच्या शपथविधीला सुरुवात झाली. ज्येष्ठतेनुसार विधानसभा सदस्यांनी शपथ घेतली. मावळते मुख्यमंत्री देवेंद्र फडणवीस, पृथ्वीराज चव्हाण, एकनाथ शिंदे, आशिष शेलार, गिरीश महाजन यांनी शपथ घेतली. यावेळी युवासेना नेते आदित्य ठाकरे हे सभागृहात एकनाथ शिंदे यांच्या शेजारी पुढच्या बाकावर बसले होते.

सभागृहात शपथविधीसाठी अजित पवारांचं नाव पुकारण्यात आलं. त्यावेळी आशिष शेलार यांनी “या दादा या” असा आवाज दिला. मात्र अजित पवारांनी कोणताही प्रतिसाद न देता, त्यांनी मौन पाळणं पसंत केलं.

अजित पवारांची घरवापसी

देवेंद्र फडणवीस यांचं सरकार अवघ्या 4 दिवसात कोसळल्यानंतर महाराष्ट्रात शिवसेना, राष्ट्रवादी आणि काँग्रेसचं महाविकासआघाडीचं सरकार येणार हे निश्चित झालं.  या पार्श्वभूमीवर महाविकासआघाडीचे नेते राजभवनावर सत्तास्थापनेचा दावा करण्यासाठी गेले आहेत. तर दुसरीकडे बंडखोरीनंतर माजी उपमुख्यमंत्री अजित पवार यांनी राष्ट्रवादी काँग्रेसचे अध्यक्ष शरद पवार यांची भेट घेतली. या बैठकीला राष्ट्रवादीशिवाय शिवसेनेचे महत्त्वाचे नेते उपस्थित होते. अजित पवार आणि शरद पवार यांच्या बैठकीला छगन भुजबळ, जयंत पाटील, धनंजय मुंडे, शिवसेना नेते एकनाथ शिंदे, आदित्य ठाकरे, मिलिंद नार्वेकरही उपस्थित होते.

मुख्यमंत्रिपदी उद्धव ठाकरेच!

राष्ट्रवादी काँग्रेसचे विधीमंडळ गटनेते जयंत पाटील यांनी महाविकासआघाडीच्या नेतेपदी आणि राज्याचे मुख्यमंत्री शिवसेना पक्षप्रमुख उद्धव ठाकरे असावे असा ठराव मांडला. या  ठरावाला शिवसेना, राष्ट्रवादी काँग्रेस, काँग्रेस आणि मित्रपक्षांच्या सर्व आमदारांनी एकमताने मंजूर करण्यात आला. यावेळी मुख्यमंत्री म्हणून उद्धव ठाकरे यांना नावाला एकमताने मंजुरी देण्यात आली. यामुळे आता महाराष्ट्रात ठाकरे सरकार निश्चित झालं.

संबंधित बातम्या  

अचानक आलेल्या फोननंतर सुप्रिया सुळे धावतच विधानभवनाबाहेर 

अजित पवारांची ‘घरवापसी’! बंडखोरीनंतर पहिल्यांदाच अजित पवार शरद पवारांच्या भेटीला