मनसेचा मुंबईतील पहिला उमेदवार ठरला, घोषणा होताच म्हणाला “राज ठाकरेंनी…”

MNS Bala Nandgaokar First Reaction : येत्या विधानसभा निवडणुकीला फक्त काही महिने शिल्लक आहेत. त्यातच आता महाराष्ट्र नवनिर्माण सेनेने दोन उमेदवारांची घोषणा केली आहे. मुंबईतील शिवडी विधानसभा मतदारसघांतून मनसेचे नेते बाळा नांदगावकर यांना उमेदवारी दिली जाणार आहे. तर पंढरपुरातील दिलीप धोत्रे यांना विधानसभेसाठीची उमेदवारी दिली जाणार आहे. विधानसभेची उमेदवारी जाहीर होताच आता मनसे नेते बाळा नांदगावकर यांनी पहिली प्रतिक्रिया दिली आहे.

बाळा नांदगावकरांची पहिली प्रतिक्रिया

बाळा नांदगावकर यांनी टीव्ही 9 मराठीशी संवाद साधला. यावेळी त्यांना विधानसभेसाठी उमेदवारी जाहीर झाल्यानंतर काय भावना आहेत, असा प्रश्न विचारण्यात आला. त्यावर त्यांनी मनमोकळेपणाने भाष्य केले. मला पक्षाने उमेदवारी जाहीर केली, त्याबद्दल त्यांचे खरंच मनापासून आभार. यंदा शिवडीची जनता आपला माणूस विधानसभेमध्ये पाठवेल. यंदा राज ठाकरेंनी जाहीर केलेल्या उमेदवारीचा शिवडीची जनता नक्की विचार करेल. तसेच मी कार्यकर्त्यांच्या बळावर यंदा निवडणुकीला सामोरी जाईन, असे बाळा नांदगावकर यांनी म्हटले.

“ठाकरे कुटुंबातील व्यक्तीवर टीका करणे योग्य नाही”

यावेळी बाळा नांदगावकरांनी संजय राऊतांवरही टीका केली. “संजय राऊत विसरलेत की राज ठाकरेंनी त्यांना सामनामध्ये नोकरी लावली. ते ठाकरे कुटुंबाशी प्रामाणिक असले तरी त्यांनी ठाकरे कुटुंबातील व्यक्तीवर टीका करणे योग्य नाही. हे त्यांना कितपत शोभते माहिती नाही”, असे बाळा नांदगावकर म्हणाले.

“भाषेचा स्तर सुधारा”

“सध्या महाराष्ट्रात ज्या पद्धतीने भाषेचा स्तर घसरला आहे. तो अजिबात योग्य नाही. यामुळे माझी आमदारांना विनंती आहे की भाषेचा स्तर सुधारा. तसेच मराठवाड्यात जातीय द्वेष निर्माण झाला असला तरी तो दूर होईल. त्यामुळे मराठवाडा काल जसा होता, तसाच पुन्हा निर्माण होईल”, असेही बाळा नांदगावकरांनी म्हटले.

बाळा नांदगावकर विरुद्ध अजय चौधरी अशी होणार लढत

दरम्यान विधानसभेच्या पार्श्वभूमीवर सध्या राज ठाकरे विविध जिल्ह्यांचे दौरे करत आहेत. येत्या विधानसभा निवडणुकीत मनसे मुंबईतील 36 विधानसभा जागा लढवणार असल्याचे बोललं जात आहे. त्यानंतर आज राज ठाकरे यांनी मुंबईतील पहिला उमेदवार जाहीर केला आहे मुंबईतील शिवडी विधानसभा मतदारसघांतून बाळा नांदगावकर यांना मनसेने उमेदवारी जाहीर केली आहे. यामुळे शिवडी विधानसभा मतदारसंघात बाळा नांदगावकर विरुद्ध शिवसेना ठाकरे गटाचे अजय चौधरी अशी लढत होणार आहे.