जेलमधून बाहेर येताच अजित पवार गटाचे नेते नवाब मलिक यांच्या भेटीला; मलिकांच्या भूमिकेकडे लक्ष

मुंबई | 15 ऑगस्ट 2023 :  राष्ट्रवादीचे वरिष्ठ नेते नवाब मलिक यांना चार दिवसांआधी जामीन मंजूर झाला आहे. दोन महिन्यांच्या जामीनावर नवाब मलिक बाहेर आबहेत. प्रकृतीच्या कारणावरुन त्यांना जामीन देण्यात आला आहे. त्यांना जामीन मिळाल्यानंतर राष्ट्रवादीच्या अजित पवार गटातील नेत्यांनी नवाब मलिक यांची भेट घेतली आहे. राष्ट्रवादी अजित पवार गटाचे प्रदेशाध्यक्ष सुनील तटकरे, खासदार प्रफुल्ल पटेल, अजित पवार गटाच्या महिला प्रदेशाध्यक्षा रूपाली चाकणकर, अजित पवार गटाच्या युवक राष्ट्रवादीचे प्रदेशाध्यक्ष सूरज चव्हाण यांच्यासह राष्ट्रवादीचे अन्य पदाधिकारी उपस्थित होते.

नवाब मलिक तुरुंगात असतानाच राष्ट्रवादीत फूट पडली आहे. अजित पवार यांनी भाजपसोबत जाण्याचा निर्णय घेतला. तर भाजपशी हातमिळवणी शक्य नसल्याचं शरद पवार यांनी जाहीर केलं आहे. नवाब मलिक सध्या जामीनावर आहेत. अशा परिस्थितीत नवाब मलिक यांची भूमिका काय असणार याकडे राष्ट्रवादीसह राजकीय वर्तुळाचं लक्ष आहे.

राष्ट्रवादी काँग्रेस पार्टीचे राष्ट्रीय कार्यकारी अध्यक्ष मा. खा. प्रफुल पटेल आणि प्रदेशाध्यक्ष मा. खा. सुनिल तटकरे यांनी आज आमचे ज्येष्ठ नेते मा. नवाब मलिक जी यांची त्यांच्या निवासस्थानी सदिच्छा भेट घेतली.

यावेळी महिला प्रदेशाध्यक्ष रुपाली चाकणकर, युवक प्रदेशाध्यक्ष सूरज… pic.twitter.com/bZx18OrPl3

— NCPspeaks_Official (@NCPSpeaks1) August 15, 2023

प्रफुल पटेल यांनी या भेटीनंतर प्रतिक्रिया दिली आहे. नवाब मलिक यांच्या प्रकृतीची विचारपूस करण्यासाठी आलो होतो. 16 महिन्यानंतर त्यांना जामीन मिळाला आहे. तुमच्यासोबत आहोत हे सांगण्यासाठी आम्ही आलो होतो. असं त्यांनी सांगितलं.

राजकीय विषयावर चर्चा केलेली नाही. 25-30 वर्षांपासून आम्ही एकत्र आहोत. माणुसकी म्हणून, मित्र म्हणून त्यांना भेटायला आलो. ही केवळ सदिच्छा भेट होती. राजकीय भेट नव्हती. दुसरा कुठलाही अर्थ काढू नका.त्यांची प्रकृती सुधारल्याशिवाय दुसरे कुठलेही काम त्यांनी करू नये, असंच आमचं म्हणणं आहे, असं प्रफुल्ल पटेल म्हणालेत.

नवाब मलिक यांच्या जामीनाचं कारण काय?

कुर्ला येथील जमीन गैरव्यवहार प्रकरणात 23 फेब्रुवारी 2022 या दिवशी नवाब मलिक यांनी ईडीने अटक केली होती. तब्बल दीड वर्षांनंतर नवाब मलिक यांना प्रकृतीच्या कारणामुळे दोन महिन्यांचा जामीन मिळाला आहे. नवाब मलिक यांना किडनीचा आजार आहे. त्यांची किडनी निकामी झाली आहे. या आजारावर उपचारांसाठी जामीनाची मागणी नवाब मलिक यांनी केली होती. ती मागणी सर्वोच्च न्यायालयाने मान्य केली. त्यानंतर त्यांना जामीन देण्यात आला.