सुप्रिया सुळे यांचा मोबाईल, व्हॉट्सअप हॅक; ट्विट करत म्हणाल्या…

Supriya Sule WhatsApp Hack : राष्ट्रवादी शरद पवार गटाच्या खासदार सुप्रिया सुळे यांचा मोबाईल आणि व्हॉट्सअॅप हॅक झालं आहे. त्यामुळे एकच खळबळ उडाली आहे. सुप्रिया सुळे यांनी स्वत:च ट्वीट करत याबद्दलची माहिती दिली. तसेच सुप्रिया सुळे यांनी याबद्दल पोलिसात तक्रार दाखल केल्याचे सांगितले.

सुप्रिया सुळे यांनी त्यांच्या अधिकृत ट्वीटरवरुन आज दुपारी 1 च्या सुमारास एक ट्वीट केले आहे. या ट्वीटद्वारे त्यांनी फोन आणि व्हॉट्सअ‍ॅप हॅक झाल्याचे सांगितले. “अत्यंत महत्वाचे – माझा फोन आणि व्हॉटस्अप हॅक झाले आहे. कोणीही मला मेसेज किंवा फोन करून नये. याबाबत मी पोलीस तक्रार करत आहे. कृपया याची नोंद घ्यावी”, असे सुप्रिया सुळे यांनी ट्वीटमध्ये म्हटले आहे.

सुप्रिया सुळे यांचे ट्वीट

*** अत्यंत महत्वाचे *** माझा फोन आणि व्हॉटस्अप हॅक झाले आहे. कोणीही मला मेसेज किंवा फोन करून नये. याबाबत मी पोलीस तक्रार करत आहे. कृपया याची नोंद घ्यावी. – सुप्रिया सुळे

— Supriya Sule (@supriya_sule) August 11, 2024

सुप्रिया सुळे यांच्या ट्विटनंतर राज्यातील राजकारणात एकच खळबळ उडाली आहे. गेल्या काही महिन्यांपासून व्हॉट्सअॅप, ई-मेल, फोन हॅक होण्याच्या घटना वारंवार समोर येत आहेत. तसेच अनेक सरकारी अधिकाऱ्यांचीही खातीही हॅक झाल्याचे पाहायला मिळत आहे. त्यातच आता एका खासदाराचा फोन हॅक झाल्याच्या घटनेमुळे राजकीय वर्तुळात खळबळ उडाली आहे.

नेमकं काय घडलं?

दरम्यान सध्या सुप्रिया सुळे या शिवस्वराज्य यात्रेत सहभागी झाल्या आहेत. आज राष्ट्रवादी शरद पवार गटाची शिवस्वराज्य यात्रा पुण्यातील दौंड भागात आहे. यावेळी भाषणादरम्यानही सुप्रिया सुळे यांनी नेमकं काय घडलं, याचा घटनाक्रम सांगितला.

“मी बराच वेळ माझ्या फोनवर व्यस्त होते. याचं कारण माझा फोन हॅक झाला. माझा फोन माझ्यासोबत इतर कोणीतरी ऑपरेट करत आहे. मी जेव्हा इथे आले तेव्हा माझ्या हे लक्षात आले. या ठिकाणी आल्यावर माझं व्हॉट्सअॅपच सुरु होत नव्हतं. मी जयंत पाटील यांनी मला नमस्कार मेसेज करा असे सांगितले. त्यांनी तो मेसेज केल्यानंतर मी फोनवर काहीही न करता त्यांना समोरुन नमस्कार असा मेसेज आला. यानंतर मी माझा फोन बंद केला. मी पुन्हा दोन, तीन जणांना माझ्या फोनवर मेसेज करण्यास सांगितले. त्यांनाही समोरुन मेसेज आला. माझा फोन बंद आहे. मी सिमकार्ड काढलं आहे. पण तरीही जे कोणी मला मेसेज करतात, त्यांच्याशी कोण गप्पा मारतंय, याची मला कल्पना नाही. माझा फोन हॅक झाल्यानंतर मी पोलिसांकडे तक्रार दाखल केली आहे. मी कोणावरही आरोप केलेले नाहीत. माझा फोन कोणी हॅक केला मला माहिती नाही. यांच्याशी कोण गप्पा मारतंय हे देखील मला माहिती नाही”, असे सुप्रिया सुळेंनी म्हटले.