नोकर भरतीत स्थानिकांना प्राधान्य द्या, मनसे आक्रमक

पालघर : पालघरमधील (Palghar) डहाणू आदिवासी विकास प्रकल्पात संगणक शिक्षकांच्या आयोजित केलेल्या ऑनलाईन परीक्षेदरम्यान मनसेने(MNS) आंदोलन केले. स्थानिक नोकर भरतीत स्थानिकांना डावलंल जात असून त्यांना सर्वप्रथम प्राधान्य द्या असे पावित्रा घेत मनसे आक्रमक झाली आहे. या आंदोलनादरम्यान मनसेच्या काही कार्यकर्त्यांना पालघर पोलिसांनी ताब्यात घेतलं आहे.

एकात्मिक आदिवासी विकास प्रकल्प, डहाणू अंतर्गत आश्रम शाळेत गेल्या 8 वर्षांपासून अनुसूचित जमातीतील 27 सुशिक्षित तरुण कंत्राटी पद्धतीने संगणक शिक्षक/निदेशक या पदावर कार्यरत होते. पण शासन निर्णयातील जाचक अटीमुळे मात्र हे तरुण आठ महिन्यांपासून बेरोजगार झाले आहेत. त्यांचे भविष्य अंधकारमय बनले होते. त्यामुळे या बेरोजगार तरुणांनी मनसेचे जिल्हाध्यक्ष कुंदन संखे यांची भेट घेतली होती.

दरम्यान एकात्मिक आदिवासी प्रकल्पाअंतर्गत 57 संगणक शिक्षक भरतीची परीक्षा आयोजित करण्यात आली होती. पालघर येथील सोनोपंत दांडेकर महाविद्यालयात ही परीक्षा होणार होती. ही परीक्षा देण्यासाठी मोठ्या प्रमाणात बाहेरील तरुण उपस्थित होते

पालघर जिल्ह्यात मोठ्या प्रमाणावर बेरोजगारी असताना देखील येथील तरुणांना डावललं जात आहे. त्यामुळे मनसेचे जिल्हाध्यक्ष यांनी आक्रमक पावित्रा घेत महाविद्यालयाच्या गेटबाहेर विद्यार्थ्यांना मनसेने अडवले. तसेच यावेळी मनसेकडून परीक्षा उधळून लावण्याचा प्रयत्न करण्यात आला. यावेळी पोलिसांनी मनसेचे जिल्हाध्यक्ष कुंदन संखे यांसह कार्यकर्त्यांना ताब्यात घेतले.