Sanjay Shirsat: उद्धव ठाकरे आमचे कुटुंबप्रमुख होते पण आता नाहीत, काँग्रेस-राष्ट्रवादी सोबत जाणं आम्हाला पसंत नाही- संजय शिरसाट

औरंगाबाद : उद्धव ठाकरे (Uddhav Thackeray) आमचे कुटुंबप्रमुख होते आता ते आमचे कुटुंबप्रमुख नाहीत. ते भाजपसोबत गेले नाहीत. त्यांनी राष्ट्रवादी आणि काँग्रेससोबत जाणं पसंत केलं. त्यांचा हा निर्णय आम्हाला मान्य नाही. ते आता आमचे कुटुंबप्रमुख नाहीत, असं शिंदेगटाचे आमदार संजय शिरसाट यांनी म्हटलंय. संजय शिरसाट (Sanjay Shirsat) यांनी काल एक ट्विट केलं त्याची जोरदार चर्चा झाली. शिरसाट पुन्हा एकदा उद्धव ठाकरेंसोबत जाणार असल्याची चर्चा झाली. त्यावर आता खुद्द संजय शिरसाट यांनीच आपली प्रतिक्रिया देत भाष्य केलंय. “मी एकनाथ शिंदेंसोबत होतो, आहे आणि त्यांच्याच सोबत राहणार आहे. का झालेलं ‘ते’ ट्विट मोबाईलचा टेक्निकल प्रॉब्लेममुळे झालं”, असं संजय शिरकाट म्हणालेत. शिवाय उद्धव ठाकरे आमचे कुटुंब प्रमुख होते आता नाहीत, असंही त्यांनी सांगितलं आहे.

संजय शिरसाठ यांनी आपल्या ट्विट मधून उद्धव ठाकरे यांचा महाराष्ट्राचे कुटुंबप्रमुख असा उल्लेख केलेला आहे. तसेच उद्धव ठाकरे यांचं विधानसभेतलं एक भाषण ही त्यांनी त्या ट्विटला जोडलेलं आहे. त्यामध्ये उद्धव ठाकरे दिलेलं वचन आम्ही पाळतोच आणि दिलेला शब्द हा खरा करून दाखवतोच, असे म्हणताना दिसत आहेत. तर संजय शिरसाट यांची अलीकडेच झालेल्या मंत्रिमंडळ विस्तारात वर्णी लागलेली नाहीये. त्यामुळे संजय शिरसाठ यांना मंत्रिपदाचे वचन मिळालं होतं का? आणि ते वचन पूर्ण झालं नाही, म्हणून शिरसाठ यांचे हे संकेत आहेत का? असा सवाल उपस्थित करणार हे ट्विट आहे. मात्र काही वेळातच त्यांनी हे ट्विट डिलीटही केलं.

मंत्रिमंडळ विस्तारापूर्वी मुख्यमंत्री एकनाथ शिंदे यांच्या नंदनवन बंगल्यावर गेले होतो. त्यावेळी त्यांच्याशी मंत्रिपदावर चर्चा झाली होती. शेवटी यादी फायनल झाली. त्यावेळीही मी त्यांच्याशी बोललो होतो. त्यांनी सर्वांशी चर्चा केली आणि यादी तयार केली. त्यामुळे त्यांच्याविरोधात हे स्टेटमेंट नाही. मी माझी नाराजी मुख्यमंत्री एकनाथ शिंदे यांना बोलून दाखवली आहे. मला कॅबिनेट मंत्रिपदाची अपेक्षा आहे. शिंदेसाहेब ते देतील अशी अपेक्षा आहे, असंही शिरसाट म्हणालेत.