Shivsena MLA Audio Clip : ‘आता आपला निर्णय शिंदेसाहेब’, आमदार रमेश बोरणारेंची कार्यकर्त्यासोबतची ऑडिओ क्लिप व्हायरल
शिवसेनेचे वैजापूर विधानसभेचे आमदार रमेश बोरणारे (Ramesh Bornare) यांची एक कथित ऑडिओ क्लिप व्हायरल होत आहे. त्यात ते आपला पप्पू पाटील नावाच्या कार्यकर्त्याशी संवाद साधताना पाहायला मिळत आहे. यात आपला निर्णय शिंदे साहेब, असं आमदार बोरणारे सांगत असल्याचं ऐकायला मिळत आहे.
मुंबई : शिवसेनेचे मातब्बर नेते एकनाथ शिंदे (Eknath Shinde) यांनी बंडाचं निशाण फडकावल्याने शिवसेनेत मोठा भूकंप पाहायला मिळतोय. राज्यसभेपाठोपात विधान परिषद निवडणुकीतही भाजपनं महाविकास आघाडीला (Mahavikas Aghadi) जोरदार हादरा दिलाय. या निवडणुकीत शिवसेना आणि काँग्रेसची मतं फुटल्याचं स्पष्ट झालं. एकीकडे निवडणूक निकालाची धामधुम सुरु असताना दुसरीकडे एकनाथ शिंदे यांनी समर्थक आमदारांसह सूरत गाठलं. तिथे लि मेरेडियन हॉटेलमध्ये शिंदे यांच्यासह त्यांचे समर्थक आमदार आहेत. शिंदे यांचं हे बंड शमवण्यासाठी शिवसेनेकडून प्रयत्न करण्यात आले. मात्र, शिंदे शिवसेनेनं भाजपसोबत सत्ता स्थापन करावी या मतावर ठाम आहेत. अशावेळी शिवसेनेचे वैजापूर विधानसभेचे आमदार रमेश बोरणारे (Ramesh Bornare) यांची एक कथित ऑडिओ क्लिप व्हायरल होत आहे. त्यात ते आपला पप्पू पाटील नावाच्या कार्यकर्त्याशी संवाद साधताना पाहायला मिळत आहे. यात आपला निर्णय शिंदे साहेब, असं आमदार बोरणारे सांगत असल्याचं ऐकायला मिळत आहे.
आमदार रमेश बोरणाने आणि कार्यकर्त्याचा संवाद
आमदार – काय चाललं?
कार्यकर्ता – काही नाही साहेब, तुमच्या आशीर्वादानं तुमच्या मागं.
आमदार – बरंय ना पण?
कार्यकर्ता – हो… तुमचा निर्णय?
आमदार – आता आपला निर्णय शिंदे साहेब.
कार्यकर्ता – आमच्या निर्णय बोरनारे साहेब…
आमदार – आं….
कार्यकर्ता – आमचा सर्वसामान्यांचा निर्णय बोरनारे साहेब
आमदार – शिंदे साहेब ना?
कार्यकर्ता – नाही नाही… तुमचा निर्णय शिंदे साहेब, आमचा निर्णय बोरनारे साहेब.
आमदार – हो… धन्यवाद, धन्यवाद.
कार्यकर्ता – चला… अभिनंदन साहेब.
आमदार – हो… हो… हो…
एकनाथ शिंदे आणि उद्धव ठाकरे यांच्यात 15 मिनिटे फोनवर चर्चा
एकनाथ शिंदे यांचं बंड शमवण्यासाठी शिवसेनेकडून हरप्रकारे प्रयत्न केले जात आहेत. त्यासाठीच शिवसेनेकडून मिलिंद नार्वेकर आणि रविंद्र फाटक यांना सूरतला शिंदे यांच्याशी चर्चा करण्यासाठी पाठवलं. सूरतमधील हॉटेल लि मेरेडियनमध्ये त्यांच्यात जवळपास तासभर चर्चा झाली. त्यावेळी मुख्यमंत्री उद्धव ठाकरे यांच्यात फोनवरुन चर्चा झाल्याची माहिती मिळतेय. जवळपास 18 मिनिटे ही चर्चा झाल्याची माहिती मिळत आहे. नार्वेकर यांच्या फोनवरुनच शिंदे आणि ठाकरे यांच्यात बोलणं झालं असल्याचं सूत्रांकडून कळतंय. यावेळी शिंदे यांनी गटनेते पदावरुन करण्यात आलेली हकालपट्टी, खासदार संजय राऊथ यांनी माध्यमांशी बोलताना केलेल आरोप, याबाबत तीव्र नाराजी व्यक्त केलीय. त्याचबरोबर तुमचं तुम्ही ठरवा, आता आमचं आम्ही बघतो, असंही शिंदे म्हणाल्याचं सूत्रांकडून कळतंय.
