चंद्रकांत पाटलांशी फक्त सदिच्छा भेट, शिवसेना जिल्हाप्रमुखांनी ‘गुप्त भेटी’च्या चर्चा धुडकावल्या
"मी नाराज असल्याची चर्चा चुकीची आहे. आम्ही शिवसेनेत वरिष्ठांच्या आदेशावर काम करतो" असंही आनंद पवार यांनी सांगितलं.
सांगली : भाजपा प्रदेशाध्यक्ष चंद्रकांत पाटील (Chandrakant Patil) यांनी फक्त सदिच्छा भेट दिली, त्यावेळी कोणतीही राजकीय चर्चा झाली नाही, असं स्पष्टीकरण शिवसेनेचे सांगली जिल्हाप्रमुख आनंद पवार यांनी दिले आहे. चंद्रकांतदादा सांगलीतील शिवसेना कार्यालयात गेल्यानंतर गुप्त बैठक झाल्याच्या चर्चा रंगल्या होत्या. (Shivsena Sangli District Chief denies political talk with Chandrakant Patil)
“सर्व शिवसैनिक हे महाविकास आघाडीचे उमेदवार अरुण अण्णा लाड यांचाच प्रचार करणार आहेत. शिवाय इस्लामपूर नगरपालिकेमध्ये राष्ट्रवादी सोडून सर्वपक्षीय आघाडीची सता आहे, त्यामुळे तिथे भाजप आणि शिवसेना युती आहे असं म्हणता येणार नाही” असं आनंद पवारांनी स्पष्ट केलं. “मी नाराज असल्याची चर्चा चुकीची आहे. आम्ही शिवसेनेत वरिष्ठांच्या आदेशावर काम करतो” असंही आनंद पवार यांनी सांगितलं.
पुणे पदवीधर मतदारसंघ निवडणुकीच्या रिंगणात भाजपकडून जिल्हा बँकेचे उपाध्यक्ष संग्राम देशमुख (Sangram Deshmukh) उतरले आहेत. त्यामुळे सांगली जिल्ह्यात राष्ट्रवादीच्या विरोधात चंद्रकांत पाटील यांनी पुढाकार घेत आनंदराव पवार यांच्याशी शिवसेना कार्यालयात गुप्तपणे चर्चा केल्याचं बोललं जात होतं.
सांगली जिल्ह्यामध्ये पदवीधरचे 84 हजार 191 मतदार आहेत. त्यामुळे चंद्रकांतदादांनी सांगली जिल्ह्यातून मोट बांधण्याचे ठरवले आहे. चंद्रकांत पाटील यांनी याआधी सदाभाऊ खोत यांची तलवार म्यान केली होती.
पुण्यात मुख्य लढत कोणामध्ये?
विधान परिषदेच्या पुणे पदवीधर आणि शिक्षक मतदारसंघातील लढतीचे चित्र स्पष्ट झाले आहे. पुणे पदवीधरसाठी 62 तर शिक्षकसाठी 35 उमेदवार रिंगणात आहेत. पुणे पदवीधर मतदारसंघातून 62 उमेदवार रिंगणात असले तरी प्रमुख लढत राष्ट्रवादी काँग्रेसचे उमेदवार अरुण लाड आणि भाजपचे संग्राम देशमुख यांच्यामध्ये होणार आहे. विशेष बाब म्हणजे दोघेही सांगली जिल्ह्यातील आहेत.
PHOTO | पदवीधरच्या निवडणुकांसाठी चंद्रकांत पाटलांनी कसली कंबर; बैठका, चर्चासत्र सुरुhttps://t.co/XsAzY5oFYl@ChDadaPatil #bjp #pune #Elecciones2020 #ElectionCommission
— TV9 Marathi (@TV9Marathi) November 17, 2020
पुणे पदवीधर प्रमुख उमेदवार
अरुण लाड (राष्ट्रवादी काँग्रेस)
संग्राम देशमुख (भाजप)
रुपाली पाटील (मनसे)
शरद पाटील (जनता दल)
सोमनाथ साळुंखे (वंचित बहुजन आघाडी)
श्रीमंत कोकाटे (इतिहास संशोधक)
डॉ. अमोल पवार (आम आदमी पक्ष)
अभिजित बिचुकले (अपक्ष)
संबंधित बातम्या :
पुणे पदवीधर मतदारसंघासाठी चंद्रकांतदादा मैदानात, सांगलीत चक्क शिवसेना जिल्हाप्रमुखाशी गुप्त चर्चा
पुणे पदवीधरचे चित्र स्पष्ट, राष्ट्रवादीचे अरुण लाड आणि भाजपचे संग्राम देशमुख यांच्यात मुख्य लढत
पुणे पदवीधर निवडणुकीतून ‘रयत’ची माघार, तर खोतांचा सन्मान राखण्याची चंद्रकांत पाटलांची ग्वाही
(Shivsena Sangli District Chief denies political talk with Chandrakant Patil)